E faatalofa atu i le suafa faapelepele o Keriso lo tatou Alii Faaola. Malo le soifua maua ma le lagi manuia i lo tatou atunuu. E viia lava le agalelei o le Atua i lana tausiga ma lona alofa tunoa ia te oe ma au i aso uma ua toe maua ai nei avanoa taua tatou te fetufaai ai i le Tusi Paia, o lona finagalo tusitusia mo i tatou.
O lea ua tatou aga atu nei i le siui o le Feagaiga Fou ia poo le Tusi Paia foi. Malo le onosai. Alo maia o le a tatou sailiili atu i tusi e tolu na tusia e Ioane lea ua faaigoaina o le 1 Ioane, 2 Ioane ma le 3 Ioane.
E le o ni tusi tetele peitai e ese le anoa ma le loloto o mataupu o loo talanoaina e Ioane e mafai ai ona tatou iloa ma malamalama i le alofa tunoa o le Atua ma le galuega togiola a Keriso ina o tatou maua le ola e faavavau. E ui e leai se vaega o le tusi o tau mai ai e Ioane o ia na tusia, peitai tatou te iloa i talafaasolopito o le ekalesia Kerisiano, o Ioane lava le soo na mulimuli maliu o le toasefululua na uluai tofia e Keriso. O le feau ma faaupuga ma le auala o loo tusia ai nei tusi e tolu, e tali tutusa ma le evagelia poo le tala lelei lea na tusia e Ioane.
Talu ai ona e leai se tasi o patino i ai le tusiaina o lenei tusi, o lea e masalomia o i latou o loo tusi i ai, o Ekalesia Kerisiano tau lalata ane i Efeso, le nuu na aumau ai Ioane i ona toe aso. Na tusia lenei tusi i le vaitau o le 90 AD. O Ioane o le aposetolo na mulimuli maliu, ma o ia foi e sili ona matua. O lona uiga ua iai i se vaimea o le 90 i le 95 tausaga le matua o lona soifua.
O le vaiatau foi lea ua sasao e pei o le afi mumu le talaiga ua taua o le Nosisi poo le gnoscticism i le faaperetania e pei ona tatou talanoa muamua ai foi. O le upu Nosisi e sau mai le upu Eleni e taua o le gnosis, e maua ai le upu peretania o le knowledge poo le poto. O lo latou manatu ua na o i latou ua faaalia atu i ai e le Atua le poto faapitoa e malamalama ai i aoaoga faapitoa tuusao mai le lagi. O lenei aoaoga ma lenei talaiga ua avea lea ma fili numera tasi o le ekalesia Kerisiano i ia ona po. O lenei aoaoga e faapea, o mea o le tino e leaga lea ma o loo iai le agasala, ae o mea faalelagi e lelei lea ma e le mafai ona feaiaai pe nini faatasi mea nei e lua.
E foliga e sao, peitai o lenei ituaiga o aoaoga e feteenai lea ma le liutino tagata o Keriso, o le ogatotonu lemu o le faatuatuaga Kerisiano, o Keriso ua fanau mai i le taupou, ua liutino tagata o ia aua le taulaga o le togiola. O le folafolaga a le Atua ina ua agasala le tagata, o le a fanau mai le Tama na te tuimomomomo le ulu o le gata. O le uluai valoaga lea o le afio mai o le Mesia. O le afio mai i le mea o loo iai le agasala.
Na valoia foi e Perofeta i le tele o tausaga. Ina ua afio mai o Ia, na alaga Ioane le Papatiso ma faapea atu, ‘Faauta i le Tamai mamoe a le Atua, o le na te aveesea agasala a le lalolagi’. O Keriso lava o ia na fetalai, ‘Ou te lei sau mo e amiotonu ae mo e agasala’. O le aoaoga la faanosisi ua teena ai le afio mai o Keriso i le tino, ona e talitonu i latou e le mafai ona afio mai le Atua mamalu i le mea o iai le agasala, ae afai foi e afio mai, e le mafai ona toe foi atu i le lagi.
O lea foi ua toe teena ai ma le isi talitonuga maumaututu o le faatuatuaga Kerisiano, o Keriso na maliu, tanumia, ma toetu ma afio atu o ia i le lagi, o loo i le itu taumatau o le Tama. O se tasi o vaega sese o lenei talaiga e faapea o le tino o le tagata, o le itu agasala lea e le papai atu i le agaga o le tagata, le itu lelei. O lona uiga afai e agasala le tino, o le a le aafia ai lona agaga. E le mafai foi ona agasala le agaga. O le tino e pala lava i lalo nei ae o le agaga e foi atu i luga. E foliga foi e sao lelei lenei aoaoga peitai ae e silasila totoa lava i ai, ua avea lenei aoaoga ma laisene mo le tino e fai ai lava le agasala i le mea e pau mai ai aua e le aafia ai lava le agaga. O nei ituaiga o aoaoga ua matua ilitata lava i ai le aposetolo o Ioane.
O le autu lena o le tusia e Ioane o nei tusi, ina ia taumafai ai e faamalamalama le ola e faavavau i tagata Kerisiano, ma ia faamalosia lo latou faatuatua ma le iloa, ina ia aua nei faaseseina i latou i lenei aoaoga ona ua mafuli atu i ai le toatele o tagata. Ua faaigoaina e Ioane nei tagata ma latou aoaoga, o e ‘talapepelo (2:22), o e taufaasese (2:26), o perofeta pepelo (4:1), o anetikeriso (2:18, 22)’.
O le toatele o i latou nei o tagata foi sa lolotu ma talitonu i le faatuatuaga Kerisiano, ae ua o ese atu i latou (2:19) ma o atu i le lalolagi (4:1) e faalauiloa la latou talaiga sese. O le vaega autu o le aoaoga a Ioane, o le faailoaina atu lea o le maua e le tagata o le ola e faavavau ina ua ‘faatuatua i le suafa o le Alo o le Atua’ (5:13) O nisi o mataupu autu poo upu foi o loo faamamafaina e Ioane e aofia ai le upu o le ‘alofa’, o le ‘malamalama’, o le ‘ola’.
O se tasi autu o lenei tusi o le matua faamaninoina poo le faamautuina lea o le manatu ma le lagona o le Kerisiano ua ia maua le ola e faavavau ina ua talia Keriso pe ua faatuatua ia te ia. E le o se mea e masalomia lea tulaga e pei ona taumate e le toatele pe sao i le lagi pe leai. E pei ona ia faamautuina i le 1 Ioane 5:13: “Ua ou tusi atu nei mea ia te outou o e faatuatua i le suafa o le Alo o le Atua, ina ia outou iloa ai ua ia te outou le ola e faavavau, ina ua outou faatuatua foi i le suafa o le Alo o le Atua”. O le laina e tatau ona malamalama i ai o loo faapea “ina ia outou iloa ai, Ua, ia te outou le ola e faavavau”. O le taimi e maua ai le ola e faavavau, o le taimi nei lava poo le taimi ua e talia ai Keriso. O le ola e faavavau e le gata o loo faatatau i le umi o lea soifuaga, ae o le ituaiga o soifuaga e ola ai.
O loo tatou ola i le taimi lenei i le Alofa Tunoa o le Atua, ae o le lumanai o le tatou ola i le mamalu o le Atua i le lagi. Afai o e masalosalo pe e te le o mautinoa le moni o lou faatuatua, ona e fesili lea i fesili nei e tolu ia te oe lava.
O le fesili muamua, Ua e faatuatua (4:2). Manatua e ese le iloa ese le faatuatua. Ua ala ona e iloaina ona na e faalogo i ai i le aoga aso sa, o le lauga, o le aoaoga a ou matua. Peitai e mafai lava ona e iloa ae e te filifili lava e te le faatuatua pe talitonu i ai.
Lona lua, O e usitaia ma mulimuli i le aoaoga a le Tusi Paia i aso uma (2:3). Afai e te le ola i le Upu a le Atua o lona uiga o loo e faia lava e oe lou loto ma le agasala. Salamo nei ma faatoese i le Atua.
Ma le vaega lona tolu o le tofotofoina lea o le moni o lou alofa (4:20). O nisi ua toaga lava i le lotu ma lagi le alofa i le Atua peitai e le malu le mama i lona tuaoi. E faigata tele ona iloa le moni o le faatuatua i le Atua ma le ola e tusa ma afioga a le Atua ona o uiga le alofa i lona uso o loo faaalia.
Fai mai Ioane, e faapefea ona fai mai e alofa i le Atua e le o vaaia, ae o lona uso poo le isi tagata o loo vaai i ai i aso uma ae le alofa iai? Afai e le mafai ona tali atoatoa i fesili na e tolu, fai mai Ioane o lena tagata o le pepelo lava ia. (4:20) E pei lava na ou fai atu i le amataga o le tusi a Ioane, e fai lava si anoa ma e foliga mai e malu ae ivia. Ia fesoasoani atu le Agaga paia o le Atua ia te oe e musuia lou finagalo ma lou loto ina ia mafai ona maua le mautinoa o le ola e faavavau ina ua talia Keriso i o taua loto.
