I le suafa manumalo o Keriso lo tatou Faaola, ou te faatalofa atu ai i le agaga faaaloalo ia Samoa lou atunuu pele. O fea se vaega o le Kelope o loo e alaala ai e talitonu le agaga, o loo e manuia oe ona o le agalelei o lo tatou Tapaau o i le lagi.
Ia malo lava le soifua maua ma le lagi mama! Alo maia o le faaauauina lenei o le tatou sailiga oa i totonu o le afioga a le Atua. O a ni faalumaga faaleagaga ma ni auro ma maataua tatou te maua mai ai ina ia mafai ona tamaoaiga faaleagaga i tatou ma faapea foi ona tamaoaiga faaletino, aua e mautinoa e tusa ma le afioga a le Atua, a manuia faaleagaga le tagata, e tatau foi ona aafia ai ma lona olaga, lona aiga, fanau ma isi.
O loo aoao foi le Tusi Paia i le manuia e oo atu i le auga tupulaga tolu ma le fa, ia poo le malaia foi. O le taua lena o lo tatou malamalama ma iloa ma faatinoina le Tusi Paia, aua e iai lona aafiaga i auga tupulaga o i luma.
O le ola i le amiotonu ona o le maliu o Keriso (3:4-24) O le mataupu e tolu o loo toe faamanino mai ai e Ioane le alofa o le Atua ua fai ai i tatou ma ana fanau. “Faauta i le alofa ua foaiina mai ai e le Tama ia te i tatou ina ua taua i tatou o le fanau a le Atua i le ua faapea lava.” (3:1)
Sa ou taua le taua o le tautau o agasala i luma o le Atua i aso uma. O le finagalo lena o le Atua ma o le mea e tatau i so o se mafutaga. O se ata taua e faamatalaina ai lo tatou va ma le Atua, ina ua faia i tatou ma fanau a le Atua, poo tamafai e ala i le maliu o Keriso. Fai mai Ioane: “O i latou uma e na talia o ia ma faatuatua i lona suafa na ia avatu i ai lea manuia ia avea i latou ma fanau a le Atua. (Ioane 1:12)
Ua tauamitonuina i tatou e ala ia Keriso. Ua avea ai i tatou ma ana fanau. O le mafutaga la lea ua tatou maua, o le mafutaga i le va o le Tama ma lana fanau.
O taimi tatou te faatuatua ai ma talia ai Keriso ua avea ai oe ma tamafai, ua faamagaloina au agasala ma tauamiotonuina ai oe ma ua tusia lou igoa i le tusi o le ola. E le toe fesiligia lena tulaga.
A e agasala la, e le faapea o le a toe aveesea lou igoa ma toe suia le tulaga o lou avea ma atalii ma afafine o le Atua. E ui lava i lou sese ma faalogogata, e le mafai ona fai atu lou tama poo lou tina o le a le toe taua oe o se tasi o le la fanau ma suia lou faaiu (vagana ai se matua e le o iai le alofa o le Atua). E faapena foi le Atua. E le mafai ona ia tuliesea oe ma au. O le mafuaga lena e taua ai lo tatou alolofa ia te ia ma tautau ia te ia o tatou faaletonu, tatou te faailoa atu ai foi lo tatou alolofa ia te ia.
O le maliu la o Keriso ua mafai ai ona tatou fai atu ‘Ava le Tama e’
I le mataupu e fa, o loo aumaia ai e Ioane se tasi o vaega taua e tusa ai ma aoaoga sese e ono aafia ai le faatuatua Kerisiano. Manatua foi pe a toe foi i le amataga o lenei tusi a Ioane ma lona autu o le taumafai lea e tetee atu i aoaoga sese ua aafia ai le feau o le tala lelei, ma le afio mai o Keriso e togiola le agasala a le lalolagi.
E iai taimi e foliga mai ai le aoaoga o le Tusi Paia e mai le Atua. O nisi o taimi e foliga tutusa lava talitonuga o lotu eseese ma tapuaiga, peitai e iai ona eseesega ma aoaoga e taua e ono faaseseina ai i tatou.
Faataitaiga, e iai se tasi ekalesia latou te aoaoina e faapea o Iesu Keriso ma Satani o le auso i laua. Peitai o le aoaoga a le Tusi Paia o Lusifelo poo Satani, o se agelu na faia e le Atua ae o Iesu Keriso, o ia o le Alo e toatasi o le Atua.
O le mafuaaga lena ua aoaoina ai e Ioane le ekalesia ina ia tofotofo i agaga uma (4:1-6) aua e iai isi agaga e auina mai e le Tiapolo, o ni agaga faasese. O ni talaiga faasese, o ni lotu e faavae i aoaoga a tagata ae le o le Afioga a le Atua. Ua taua i latou e Ioane o ‘perofeta pepelo.’ (4:1)
E faapefea ona iloa le perofeta pepelo poo agaga e le mai le Atua? Fai mai Ioane, o agaga uma o e tautino ua maliu mai Iesu Keriso i le tino mai le Atua lava i latou (4:2). Manatua foi le aoaoga faanosisi e pei ona tatou talanoaina i lomiga ua mavae, e faapea e le mafai ona liutino tagata le Alo o le Atua aua e paia o ia ma e le mafai ona o mai ma tagata agasala. Peitai o Keriso lava na ia fetalai, ‘Na ou sau e saili ma faaola le na leiloa.” (Luka 19:10) O Keriso foi na fetalai, “Ou te lei sau mo e amiotonu ae mo e agasala.” (Mareko 2:13-17)
So o se tagata lava e faatautee ma so o se tapuaiga e teena o Keriso o le Alo o le Atua, fai mai Ioane, o anetikeriso lava i latou. A faamatalaina, o tagata e tetee ia Keriso. (4:3)
O le vaega mulimuli o lenei tusi a Ioane, o loo toe faamalosia ai e Ioane le taua o le mafutaga e pei ona ia amata ai lana tusi. Faataitaiga o le mafutaga – Alofa e pei o Keriso (4:7-5:3)
O le mafutaga lea poo le fesootaiga ina ua avea Keriso ma Faaola o o tatou agaga, e ala i lo tatou talia o lona maliu.
O le a le taua o lenei mafutaga? Muamua o le ola manumalo. (5:4) O i latou ua fanau mai le Atua pe ua mafuta ma le Atua, e manumalo i latou. Ua tuuina atu e le Atua le pule ma le malosi e avea ai i latou o tagata manumalo aiai. E le mafai ona e mauaina le manumalo lenei o le Atua, pe afai e le o iai sou sootaga poo se mafutaga ma le Atua. E faatusaina i le moli eletise, poo le a le malosi o le mataulia ae a le faapipiiina le uaea i le palaka, e le mafai ona maua se malosi e mumu ai.
O se tasi itu taua o le mafutaga ma Keriso, o le mautinoa lea ua avea oe ma tagata Kerisiano, poo le atalii ma le afafine moni o le Atua, ma ua e maua le ola e faavavau.
O le ola e faavavau e le o se matega tupua. E masalomia le tulaga o le afio i le lagi. O nisi e le mautinoa ma masalosalo pe maua le ola e faavavau pe leai. E ala ona iai lena lagona ona o le leai poo le motusia o le mafutaga ma le Alo o le Atua, o le na afio mai ma saunoa mai, “O au nei o le Ala, Upu Moni ma le Ola.” (Ioane 14:6) E le alu atu lava se tasi i le Tama pe a le ui mai ia te au. Silasila i le mau a Ioane 5:11: “O lenei foi le mau ua foaiina mai e le Atua ia te i tatou le ola e faavavau, o le ola lava lea ua i lona Alo. O le o ia te ia le Alo o ia te ia le ola; o le e le ia te ia le Alo, o ia te ia le ola.”
O le vaega mulimuli e taua tele, o le mafutaga lenei o le faamagaloina o agasala ma ola manumalo ai. (5:18-21) O le autu atoa lena o le afio mai o Keriso. Ina ia magalo au agasala ma au, aua ua fai a tatou agasala ma pa pupuni ua va ai i tatou ma le Atua ma leai ai se mafutaga. Peitai o le maliu o Keriso na toe maua ai le mafutaga poo le leleiga i le va o le tagata ma le Atua.
Afai o e mamao ese ma le Atua ma ua e mautinoa e leai sau mafutaga ma ia, o loo iai lou avanoa e te toe fesootai ai ma le Atua e ala i lona Alo o Keriso. O le satauro na tutui i le va o le lagi ma lalolagi, ina ia mafai ona avea o se auala i le ola e faavavau, ina ia mafai e i tatou o i le lalolagi ona ulu atu i le mafutaga ma le Atua lo tatou Tama.
Ia faamanuia le Atua ia te oe i lau filifiliga ina ia e mafuta nei i le Atua.
