E faafeiloai atu ma ofo alofa atu i le suafa o Keriso lo tatou Alii i le mamalu ma le paia o si o tatou atunuu pele Samoa. Malo le soifua laulelei, malo foi le onosai i tiute ma faiva alofilima o loo feagai ai i vaiaso taitasi aua le tautuaina o aiga ma ekalesia aemaise o Samoa, ia faapea foi ma atunuu o loo tatou aumau ai i fafo.
E viia le alofa ma le agalelei o le Atua, e le taumatea lona alofa tunoa ma lona alofa mutimutivale mo i tatou. E pei lava o upu masani a le faisalamo: “E telegese lona toasa ae televave lava lona alofa.” O se uiga ese lenei o le Atua e ao lava ona tatou faataitai i ai. Ia vave le alofa i taimi uma. Tusa lava poo a le faigata o uiga ma tala e ono aafia ai o taua finagalo, ae ia saoasaoa pea le alofa.
Masalo afai tatou te maua ma faia lea tulaga, o le a le taumatea le avea ma foliga i taua e pei o Keriso. O loo aoao le Tusi Paia ina ia o tatou foliga ia te ia.
O le faaauauina lenei o le tatou suesueina o le Tusi Muamua a Ioane
O le vaiaso i ona tua atu na tatou iloa ai le autu ma uiga o lenei tusi. O le vaiaso na tea nei na tatou iloilo ai loa i le mataupu autu.
Sa tatou talanoa i le faatauaina e Ioane o le Mafutaga poo le upu o le felosipi. Ia poo le mafuta faatasi ma le Atua atoa ai ma le ekalesia.
O auala e iloa ai le mafuta o le tagata ma le Atua, o le Savali lea i le Malamalama (1:5-7). O lona uiga, savali e tusa ma le finagalo o le Atua e pei ona faailoa mai i le Tusi Paia. O le tasi o auala e iloa ai le ola mafuta o le tagata i le Atua atoa ai ma le ekalesia, o le mafai ona ia tautau atu agasala.
E leai se mafutaga e lelei ma alualu i luma pe afai e ola le isi i le agasala ma taumafai e nana. O se faataitaiga o se ulugalii. E le mafai ona lelei ma manuia se ulugalii pe afai e le faatoese le isi i le isi ma tau atu ni ona sese ma vaivaiga. Aua a aveave ai pea faapea, e iai lava le taimi e aliae ai, ona faaletonu lea e pei o le upu e masani ai taaloga a tamaiti. ‘Na na, na na mate ia, mate fa, mate ae ua lapoa’.
O le mafutaga lena faaletino nei, peitai o le mafutaga ma le Atua e leai se na na e fai ai aua e silafia uma lava e ia a tatou amio uma ma agasala uma. E leai la se aoga e fia ola mama ai, ae tatau ona tautau a tatou agasala ma faalelei pea ma le Atua. O le auala lena e lelei ai le mafutaga.
I totonu o le ekalesia e taua tele foi lea tulaga. “O le fefaaaliai a outou agasala ma tatalo le tasi mo le isi.” (Iakopo 5:6)
Sa faapea foi ona tatou talanoa i le amio e faatinoina o le mafutaga lenei i le va ma le Atua e ala i le amio o loo manao i ai le Tusi Paia ina ia foliga ia Keriso (2:3-11), O le faatonuga na tuuina mai ina ia puipuia ai le mafutaga o le “aua nei alofa i le lalolagi” (2:12-17), atoa ai ma le lapataiga poo le faaeteetega ina ia puipui mai Anetikeriso (2:18-27).
O le a faaauauina pea la tatou suesuega i nisi o mataupu autu o loo totoe i lenei tusi.
Ola mama i lona toe afio mai (2:28-3-11)
O se tasi lenei o feau a Ioane i le ekalesia. Ia ola le tagata Kerisiano i le ola mama, paia, sauni mo le Alii i so o se taimi. Ou te talitonu afai ae tuuina atu ia te oe na itula e te sauni ai e te oti, ou te iloa o le toatele e popole poo mama, ma paia ma sauni e fetaiai ma le Alii. O le toatele foi e atuatuvale pe a iloa e le o ola i se olaga e fiafia i ai le Atua. O le mea lena e tele ai tagata e fefefe i le oti. E taua le ola tapena i so o se taimi. O le afio mai o Keriso e leai se tasi na te iloa ae ua faatusaina i le sau o le gaoi i le po, e le tuutala ma se tasi.
I nai mataupu na sei mavae atu nei, na tatou talanoaina ai le taua o le tautau o agasala i le Atua. E tatau ona faia lea tulaga i aso uma ma taimi uma ina ia aua nei faamaina (2:28) i tatou i ona luma i lona toe faaali mai. E iai nisi o loo mumusu i lea taimi. Peitai o nisi ua matua sauni lava e fetaiai ma Keriso. O loo ia te oe le faaiuga poo le tali o lena mea.
Afai e te le o tapena pe naunau i lea aso e toe afio mai ai o ia, ona e tapena lea aua o le itula e le manatunatu ai e afio mai ai le faatoafaiava.
O le ola i le amiotonu ona o le maliu o Keriso (3:4-24)
O le mataupu e tolu o loo toe faamanino mai ai e Ioane le alofa o le Atua ua fai ai i tatou ma ana fanau.
“Faauta i le alofa ua foaiina mai ai e le Tama ia te i tatou, ina ua taua i tatou o le fanau a le Atua i le ua faapea lava” (3:1).
Sa ou taua le taua o le tautau o agasala i luma o le Atua i aso uma. O le finagalo lena o le Atua, ma o le mea e tatau i se so o se mafutaga.
O se ata taua e faamatalaina ai lo tatou va ma le Atua ina ua faia i tatou ma fanau a le Atua poo tamafai e ala i le maliu o Keriso. Fai mai Ioane: “O i latou uma e na talia o ia, ma faatuatua i lona suafa, na ia avatu i ai o lea manuia, ia avea i latou ma fanau a le Atua (Ioane 1:12).
Ua tauamiotonuina i tatou e ala ia Keriso. Ua avea ai i tatou ma ana fanau. O le mafutaga la lea ua tatou maua, o le mafutaga i le va o le Tama ma lana fanau.
O taimi tatou te faatuatua ai ma talia ai Keriso ua avea ai oe ma tamafai, ua faamagaloina au agasala ma tauamiotonuina ai oe, ma ua tusia lou igoa i le tusi o le ola. E le toe fesiligia lena tulaga.
A e agasala la, e le faapea o le a toe aveesea lou igoa ma toe suia le tulaga o lou avea ma atalii ma afafine o le Atua. E ui lava i lou sese ma faalogogata, e le mafai ona fai atu lou tama poo lou tina o le a le toe taua oe o se tasi o le la fanau ma suia lou faaiu. (Sei vagana ai se matua e le o iai le alofa o le Atua.) E faapena foi le Atua. E le mafai ona ia tuliesea oe ma au. O le mafuaga lena e taua ai lo tatou alolofa ia te ia ma tautau ia te ia o tatou faaletonu, tatou te faailoa atu ai foi lo tatou alolofa ia te ia.
O le maliu la o Keriso ua mafai ai ona tatou fai atu ‘Ava le Tama e,’
Ia avea Keriso ma alii i lou loto. Talia o ia ma ola mo ia. Sauni i le taimi e te feiloai ai ma le Alii. Fesili nei ia te oe, pe ua e faataunuuina le mau a Ioane 1:12.
Ia avea Keriso ma ou faaola.
Ia faamanuia le Atua ia te oe i lau filifiliga.
