E toe faafeiloai atu foi i le agaga maulalo i le paia ma le mamalu o si o tatou atunuu. Malo lava le soifua i lenei aso.
E foliga mai o lenei faatoa oo mai le malulu i Aukilani nei ae ou te talitonu o le maua pea e si o tatou atunuu le malosi i le agalelei mai o le Atua. Faafeiloai atu faapitoa i le mamalu o Samoa i Ausetalia o loo alaala ma papaaao i lenei konitineta lapoa ma le tamaoaiga.
O le Aso Sa na tea nei na tatou faamamaluina ai le Aso Sa faapitoa mo tina uma lava o le lalolagi aemiase lava o tatou tina Samoa.
E le toe tau faamatalaina le taua o o tatou tina i totonu o se aiga. Ae avea lenei avanoa e momoli atu ai faamanuiga mo tina uma lava o loo fiafia e faitau i lenei tusitusiga i vaiaso taitasi, aemaise o tina uma o si o tatou atunuu poo fea lava o aumau ai i tulimanu e fa o le kelope.
Ia maua pea e outou le malosi mai le Atua, le atamai aua tiute e feagai ai ma le faautauta aua se manuia o si ou aiga.
O le a faaauau le tatou suesuega i le tusi a Ioane e pei ona amataina i le vaiaso ua tuanai.
O upu tomua a Ioane o loo i le 1:1-4. O loo ia tautino ai le mafutaga ma Keriso, o ia o le Lokou poo le Upu ua liu tino tagata. O le na aumaia le ola. Ua mafua ona matua tautino Ioane e uiga i le mafutaga ma Keriso i la le tino, ina ia mafai ona tau atu i tagata aemaise i latou o loo taumafai e faasese le talitonuga ia Keriso, e moni lava na afio mai o ia i la le tino. Fai mai le mau a Ioane na matou vaavaai i ai o matou mata, tagotago i ai o matou lima ma faalogologo i ai.
E taua le mafutaga (1:5-2:2). O le mafutaga o loo talanoa i ai Ioane e ese lona taua. O loo faailoa mai le mafutaga ma Keriso i la le tino. Peitai o le mafutaga sili o le mafuta faatasi ma ia i la le agaga (ona o lea ua afio o ia i le lagi) faatasi ai ma le mafutaga faatasi ma isi uso Kerisiano.
O le auala e iloa ai le moni o le mafutaga ma Keriso atoa ma le uso Kerisiano o le savali lea i le malamalama. Aua afai tatou te savavali i le malamalama e leai foi se mea pogisa tatou te faia aua o loo faamamaina pea i tatou i le toto o Keriso. “Ae afai tatou te savavali i le malamalama faapei ona iai o ia i le malamalama ona tatou mafuta faatasi ai lea o le tasi ma le tasi, o le toto foi o Iesu Keriso lona Alo e faamamaina ai i tatou i agasala uma lava” (1:5-7).
O le savaliga la i le malamalama e iloa uma ai o tatou faaletonu ma agasala. Ona tatou faia loa lea o le mea e tatau, o le tautau o a tatou agasala ona faamagaloina lea o i tatou ma tatou ola ai pea i le malamalama. “Ae afai tatou te tau atu a tatou agasala, e faamaoni o ia ma amiotonu e faamagalo a tatou agasala ma faamama mai i tatou i amioletonu uma lava (1:9).
O le vaega lona lua e taua i le lapataiga a Ioane, o amio tatau i le mafutaga (2:3-27). Manatua foi ua toatele nisi ua o ese mai le mafutaga. Ua le toe iai i totonu o le lotu ma le faatuatuaga Kerisiano ona ua faaseseina i latou i tapuaiga poo aoaoga e le tusa ma le feau na afio mai ma Keriso, lea o loo talaiina e le au aposetolo ma ona soo. “O le na te tausi i lenei feau ua mautinoa o ia lenei e alofa moni ia Keriso. A o le ua tausi i afioga e moni ua atoatoa le alofa o le Atua i totonu ia te ia” (5).
O amio la poo uiga e tatau ona faaalia e le tagata o loo mafuta ma Keriso, e mafuta foi i totonu o le ekalesia, o loo faamatalaina faapea e tatau ona foliga ia Keriso. Faitau i ai i amio e tatau i le Kerisiano (2:3-11). O uiga uma o Keriso e tatau ona puaina mai.
E le gata i le amio ae ua tuuina mai e Ioane faatonuga ina ia ola ai le Kerisiano ina ia faatumauina ai pea le foliga ia Keriso. O le faatonuga ina ia ‘aua nei alofa i le lalolagi’ (2:12-17). O le Kerisiano e alofa i le lalolagi e ola faaletino lava, toe leai se foliga o Keriso e atagia ai.
O a uiga o le lalolagi? Fai mai Ioane o le tuinanau o le tino, tuinanau o mata ma le faalialiavale o lenei olaga, e le mai le Tama ia ae mai le lalolagi. (2:16).
O le lalolagi o loo taua e le o mea na faia e le Atua ae o mea o loo iai ma pulea e le agasala ma Satani.
O le vaega mulimuli o lapataiga a Ioane, o le faaeteetega poo le lapataiga ua tuuina atu. O lenei lapataiga ina ia puipuia le ekalesia ma le mafutaga mai Anetikeriso (2:18-27). O anetikeriso nei o loo faatusaina e Ioane i tagata taufaasese ia ua faasagatau atu ia Keriso i lona afio mai atoa ai ma lana aoaoga e uiga i le ola e faavavau.
O loo amata le lapataiga i le faaupuga faapea ‘O ona aso nei e gata ai’ o lenei faaupuga poo le taimi e taua o ona aso e gata ai o loo faatatau lea i le taimi o le ‘uluai afio mai o Keriso’ o lona uiga o nei ona po poo aso o loo outou soifua ma tatou ola ai o loo faamatalaina e le Tusi Paia e faapea, o ona toe aso poo aso e gata ai. Silasila i tusi nei e fesoasoani i lona faapupulaina atili (Galuega 2:17; Eperu 1:1, 2; 1 Peteru 1:20).
O le vaitau foi lenei ua taua o aso e gata ai lea foi o loo valoia e le Tusi Paia e sau ai le tagata ua faaigoaina o le Anetikeriso.
O lea foi tagata na talanoa ai Paulo i le Ekalesia i Tesalonia ma valoia lona sau. (2 Tesalonia 2:3-9) E ui o lenei upu anetikeriso o loo faaautu lea i se tagata e toatasi ae i le mau a Ioane o loo faaaogaina foi lenei upu i tagata o loo ua iai i le taimi na tusi ai le tusi. O tagata taufaavalea, taufaasese, faatupu maseiga ma faaleaga ekalesia.
O tagata foi faatupu vevesi i totonu o le ekalesia o anetikeriso foi i latou aua e le o le finagalo o le Atua ia fevaevaeina le tino o Keriso e pei ona aoai ai e Paulo le ekalesia i Korinitio. “O ai ea Paulo, O ai ea Apolo?
E tatau lava ona tatou faaeteete ina ia aua nei o tatou faamalepe, ma faafevaevaeai le tino o Keriso. E pei ona fai mai le tusi o Faataoto: “O mea nei e ono e inosia e le Alii, o lona fitu foi ua matua inosia lava e ia.”
1. O mata faasiasia. 2. O le laulaufaiva pepelo. 3. O lima o le ua sasaa le toto. 4. O le loto e manatunatu i togafiti leaga. 5. O vae e televavave ona taufetuli i le leaga. 6. O le molimau pepelo. 7. O le na te faatupu maseiga i uso.
Ua e tagai i ai i le leaga o le faatupu leaga ma maseiga i uso. E matua inosia lava e le Atua. O le mea foi lena ua matua ilitata ai lava le aposetolo i tagata nei ua fai mea leaga ma faasese i totonu o le ekalesia ua fevaevaeai ai le ekalesia.
O le aoaoga sili lava mo tatou o le faaeteete i faamatalaga e fai e ono tupu ai maseiga i totonu o le ekalesia. O uiga e faaalia e le iloa ai Keriso, atoa ai ma le alofa i le lalolagi.
Ia avea lenei lapataiga ma auala e toe atinae ai le alofa i le Atua, alofa i lana ekalesia, alofa foi i ou uso Kerisiano.
Ou te talitonu tele i le aoaoga a le Tusi Paia e taua le ‘faalogo ma fai’. Afai o afaina oe i ni vaega o nei mea ua lapatai mai ai le Tusi Paia, e pei lava o le tala a Ioane: “Tautau a tatou agasala aua e faamaoni lava o ia e faamagalo a tatou amioletonu uma lava”. Faatoese nei i le Atua.
Faatoese nei i le faifeau ma le ekalesia pe afai o loo e faatupu vevesi. Faatoese ma liliu ese mai le alofa i le lalolagi ae alofa nei i le Atua, savali i le malamalama ona e foliga lea ia Keriso o ia na fetalai: “O Au nei o le Malamalama o le lalolagi” (Ioane 9:5).
Faamanuia le Atua ia te oe.
