Faafeiloai atu i le paia maualuga o Samoa i ona tulaga faalupe. O ou paia mai vavau e oo i le faavavau e le toe mafai ona auiliiliina e se tasi. Ae ia viia pea le Atua. E momoli atu le faamalo i le mamalu o le au faitau.
O loo tatou taumafai pea e suesue le afioga a le Atua ma taumafai ina ia maua se malamalama aua le ola faaleagaga. Aemaise le faailoa atu o lona finagalo. O le upu a le Tusi Paia, e tupu le faatuatua i le faalogo i le afioga a le Atua. O taimi uma tatou te talanoa ai i le Tusi Paia, ou te talitonu o loo faatupuina ai i lena taimi lou faatuatua.
I le aoaoga a Peteru na ia taua ai e faapea, e tatau ona faaopoopo ni mea i le faatuatua ina ia faatupuina ai.
Faaopoopo i le faatuatua le amio lelei. O le vaega mulimuli e lua e taua tele, o le fealofani ma le alofa. O nisi ua taumafai e tausi mea o loo taua i luga, peitai e faatuatuanai lava i le vaega lenei o le fealofani. O le fealofani o loo taua, o le fealofani o le au uso poo tagata o le ekalesia.
O le taumafai lea e aua le faatupuina le masei i va o uso aua o se mea matua inosia lava e le Atua. O le fealofani o le saili lea o auala e faatupuina ai le alofa ma le filemu i totonu o le au uso e tusa lava poo le a le feeseeseai o manatu ma lagona i se mataupu.
O le alofa o le vaega mulimuli o loo taua e lautua uma ai mea e pei ona aoao e Paulo i Korinito.
Ua mafua ona pulunaunauina Peteru ina ia malamalama tagata Kerisiano i lenei aoaoga taua, ona o nisi o aoaoga sese faanosisi (Gnosticism) o loo taumafai e suia ma faaseseina le aoaoga Kerisiano.
Ou te talitonu o le tele foi lea o faafitauli i totonu o ekalesia Kerisiano, ona e mafua mai i Kerisiano i le le matua faaleagaga ae faatamaninii lava mafaufau sei tulou. E faatele galuega tele le tamaitiiti i totonu o le aiga. Poo a ni auala e fau ai ia lelei se aiga, peitai o le tamaitiiti e ese lava ona manatu. E le mamafa ia te ia itu o loo lelei ai le aiga, ae faatamaitiiti lava. E faapena foi totonu o le ekalesia. O i latou e itiiti faaleagaga e leai tele se amanaiaina o mea ua faatauaina.
O le autu lena o le naunau o Peteru ina ia matutua faaleagaga le ekalesia. Aua o le taimi tonu lea ua pipii mai ai le toatele o nisi o loo faasagatau ma taumafai e faasese aoaoga Kerisiano.
I le mataupu e 2 o loo faamatalaina ai e Peteru uiga o tagata aoao sese ma a latou aoaoga pepelo. Muamua o le matautia o a latou amio, o le matapeapea ma le taufaavalea (2:1-3) ma ua toatele i latou ua mulimuli atu ia te i latou. O loo tautala i latou i upu faasausili ma le le aoga. Latou te maileia i tuinanau o le tino ma le faamataitu, o e na sosola ese i e ua nonofo ma le sese. O le a faapea lava ona le faasaoina e le Atua i latou (4-9).
O le vaega mulimuli o le tusi a le aposetolo o loo tapenaina ai le au Kerisiano i le aso e toe afio mai ai Keriso. E le faatuai le afio mai o le Alii ae tatau ona salamo i tatou uma. O nisi ua faatuai i latou ona salamo, ona ua iai le manatu e tuai mai Keriso. Peitai o le taimi a le tagata e le tutusa ma le taimi a le Atua. E le faatapulaaina e le Atua le taimi. E tutusa ia te ia le aso e tasi ma tausaga e afe. E le pule le Atua i taimi a le tagata aua o le Atua e mai le vavau e oo i le faavavau.
E faauma le tusi a Peteru e ala lea i le faamalosiau atu i Kerisiano uma ina ia tumau. Ia tumau ina ia mafai ona aulia atu lea aso. Ia faatalitali ma onosai ma faaeteete (3:10-16), ma ia tutupu (3:14-18). Ia tutupu faaleagaga i vaega nei.
Ia tutupu i le alofa tunoa. O le alofa tunoa o le pule ma le mana i lou soifua ina ia mafai ai ona faatautaia mea i le finagalo o le Atua. E le gata e tatau ona e tupu, ae tatau ona e poto i le Alii. O le poto i le Alii o le malamalama lea i ona ala e ala i le faitauina ma le malamalama i lona finagalo.
O le vaiaso a sau o le a tatou suesue ai i le Tusi Muamua a Ioane. Ia manuia lava lenei vaiaso i feau ma galuega
Soifua ona o Keriso
Lui Ponifasio
