A e faalogologo i le talaaga o lona olaga mai i le laititi seia oo lava ina faauuina, o se tasi lenei o alo o le atunuu ua tatau lava lana finauga e avea o ia ma tofi Patele o le Ekalesia Katoliko i Samoa poo atunuu foi i fafo.
O se alii na siomia lava lona olaga i le lotu, mai i le aoga laititi na aoga ai seia oo lava i aoga i atunuu mamao na faapea ona sauni ai mo lona tofiga faapatele.
O se tofiga maualuga ma e le faigofie ona ausia e soo se tasi ma o le mafuaaga lea o le vaaia o le tele o le loimata maligi i le faauuga o le Afioga Patele Filipo Kapeli o Iva i Savaii. Ua na o ia lava lana faigamalaga i le maualuga lea ua faaeaina ai i le tofi patele.
E tusa ma le to‘a 10 isi na o latou amata faatasi mai Samoa lava ia, ae sili atu le numera i vasega faaiu o lenei a‘oa‘oga – e mae‘a ia taumafaiga i Ausetalia ua na o Filipo Kapeli lava ma se alii Iapani ua mae‘a lelei aoaoga ma galuega e mafai ai ona ausia le faapatele i totonu o le Ekalesia Katoliko.
Ua muamua le faauuga o le Afioga Filipo Kapeli a o le alii Iapani ua galue nei i lona atunuu o se tiakono e faatali ai le mae‘a o lea auaunaga faato‘ā faauu ai faa-Patele. E sili atu lava i le 10 tausaga o taumafai soo se tasi e ausia le maualuga lea e mafai ai ona avea ma Patele i le ekalesia. E pei lava ona silafia o le eseesega lava o nei tofiga faaleagaga mai i isi ekalesia kerisiano o le tulaga lea e le mafai ona iai se fesootaiga faaleulugalii i tofi taupou sa ma tofi patele ma o le faigata tele lava lea ua vaaia ia i latou e iai le manaoga e ausia le maualuga lea o tofi faa faitaulaga i totonu ole Ekalesia ona o le faamaamulu o nisi ua fai aiga. O faaosoosoga tele foi ia e feagai pea ma taitai o lenei ekalesia ona o le faigata o lea itu faaletagata.
E ui o lea, e lei faavaivai i ai le Afioga Patele Filipo ona o lona faanaunautaiga, e tali atu i le manaoga ina ia faaeaina faa-Patele, e le gata i lea o le manaoga lava lea a le tuaa o lona tamā, e pei ona ia ta‘ua, ina ia iai se isi o lo latou aiga e ausia le tofi Patele.
Ua toalua taupousa e ala i tuafāfine o le tamā o lenei alii peitai e lei iai lava se isi e tulai mai i le tofi Patele. Ae e pei ona ta‘ua muamua atonu o lona tuputupu a‘e ma le siosiomaga aemaise o le lagolago na maua mai i lona aiga, ona faiaoga, ma soo se tasi na fesootai i le olaga o lenei alii talavou ua mafai ai nei ona ia ausia le faatumutumuga o le tautua ma le auaunaga faa-Patele.
O le Afioga Patele Filipo Kapeli, o se alo faasino ia Tofilau T Kapeli o Iva ma Salote Leiua Pio o Savaia Lefaga. E matua o le fanau e to‘a 10 ma o se alii na ta‘ua e lona aiga – na soifua mai lava ma siomia lona olaga atoa i le lotu.
Na aoaoina i le aoga laititi a Sagata Telesia i Safotulafai, sosoo ai ma Logoipulotu le kolisi a le Ekalesia Katoliko i Fusi, o se aoga e ta‘ua o le Euphraisea Barbier i Savaii lava ma faaauau mai ai loa i le Aoga Faafaifeau i Moamoa, faaauau ai i Ausetalia ma Fiti – toe foi mai ai ma galue o se tiakono i Samoa nei seia oo lava ina faauuina i lenei vaiaso i le laasaga fou o lona soifua auauna i le Atua i le tofi Patele.
O se tagata e alofa, mafana lana mafutaga i lona aiga aemaise i ona Aunties e toalua e taupousa uma. O se alii e finau e pei ona iai molimau a i latou na aoaoina, i latou na fesootai pea ma le Afioga i le Patele ma o lona finau foi lea na vaaia ai e na o ia lava o le vasega e latalata i le to‘a 10 na o latou taumafai faatasi i le tofi patele ua mae‘a lelei ana taumafaiga ina ua faauuina.
O le ituaiga o le Salesio (Salesian brothers – Don Bosco) ua galue ai le Afioga Patele Filipo ma o lana uluai misisa lava na faatautaia i lona nuu o Iva i le mae‘a ai o le aso na faapaiaina ai i Salelologa.
O aiga ma uo ma sui o le Ekalesia mai i atunuu mamao na molimauina uma ia sauniga i le motu tele i Salafai ma talosaga ina ia manuia ma alofa le Atua e taitai lenei alii i ona tofiga fou.
