O le vaiaso nei e malaga ai Pele Faumui le siamupini o Samoa i le aupaga ‘middleweight’ e fetaui ma le siamupini o Fiti le alli o Abhay Chand i le paga faapitoa o le fusuaga tele a le Wild West Promotions ua fa’aigoaina o le “Fight For Glory”.
Ua faalua ona taaalo ma malo Pele ia Abhay i ‘ai; muamua i Fiti ae faalua i Samoa i le tausaga ua mavae. Peitai o le a ese le taimi nei i se faamatalaga a Pele, “E lē o toe aogā se malo i ‘ai. O la‘u sauniuniga lea ua o matou koleni ai ma tama aupaga mamafa ina ia ou malo i le tu‘i oti.”
O le faiaoga ia Asiata Napoleon Stanley o loo feagai ma tapenaga, lea o loo sipā ai Pele e Alema Sonny Vaele o loo siamupini i le Super Middleweight a Samoa ma Francis Mamoe o le aupaga light heavyweight.
Faaalia e Pele, “O Abhay o se tama fusu malosi ma ou te faaaloalo i ai. Peitai e fai si o‘u vave ma o lea o le a fai foi si mamafa o a‘u tu‘i.”
Mo le faatumauina o le vave o le faipele o loo sipā ai Pele e Tony Iapesa, lea sa tuu e fusu ma Steve Heremaia o Niu Sila i Aukilani i le vaiaso ua tea ae te‘i ua toe faamaamulu Heremaia.
Ua tau fai faalauiloa e Abhay ma Pele a o lumanai le la fusuaga i le aso 1 o Tesema le tatau ona manumalo i le tu‘i oti.
I se ripoti mai Fiti o loo ta‘ua ai se suiga tele ia Abhay i totonu o le maea o le a vaaia e le aumaimoa i lea po i le Prince Charles Park in Nadi. Faaalia e le alli faiaoga o Farmaan Ali i le nusipepa o le Fiji Times e faapea, “O Abhay e matautia le vave ma le osofai malosi o le a iai.”
Saunoa Jenkins Tesese o le sui o le pulega a Pele, “Talosia ia matuā lolofi ane Fiti e tapuai ia Chand auā e lē o iai se fuafuaga e faia‘ina Pele i Fiti. O lea ua matuā lelei lana tapenaga.”
Faaalia foi e Jenkins, “E ave le faamalo i le alii faifusuaga ia Abdul Khan ma le Wild West Promotion mo le toe faia o fusuaga i Fiti. E matuā tele le taleni o loo iai i Fiti faapea foi i Samoa. Peitai a leai ni fusuaga, ua leai foi la ni taaloga e atinae ai ma maua se lumanai o tama fusu; e faapea foi i faiaoga ma asosi o fusuaga.
