Malaga le Chiefs i Pretoria- Aferika e finau le siamupini Supa 14

O se uluai taimi lenei ua ausia ai e le au lakapi a le Waikato Chiefs se tulaga e oo atu ai i le sueina o le siamupini mo le taamilosaga o le Supa 14, lea o le a fetaui ai ma le au malosi a le Bulls mai Aferika i le malae o Pretoria.
Ina ua maea ai le la taaloga ma le Hurricanes i le semi-final i Hemilitone ma manumalo ai le Chiefs i le 14-10, ma o le faalua ai lea ona faamoamoa e alii sili o Waikato le matagi mai le laumua i le tolu vaiaso, ma mautinoa ai e Hurricanes, e gata lava i Ueligitone ma Aukilani le agi malosi o le latou matagi. O se taaloga maoae na maimoaina i le va o nei au e lua, ona o le taufai malolosi ma le tinou, ae maise ai o le iloa, lotonuu ma le tino atoa ua tuu atu i luga o le laina mo le finauina o le au e filifilia mo le finals.
Sa iai i le manatu o le toatele o le Hurricanes e manumalo, talu ai o le faalima lea na latou iai i le sueina o le semi-finals i tausaga ua mavae. O le isi itu o le Chiefs e tamoemoe lava o ia e faapei o se faalata uliuli (dark horse) a o ona tua atu o loo iai le puao o se ao faaniutu e taialaina le taumafaiga a le Chiefs. E pei ona taua e le alii faiaoga o le Chiefs, Ian Forster i le 50 sekone mulimuli a o taufai malosi le sikalamu a Hurricanes i lalo o le pou sikoa, ae maise o le mataalia o le Chiefs e tetee atu (defence), o se taimi pogisa lea i le aumaimoa, ae o le malamalama ofoofogia lea i mata o tama taaalo e 30 sa i luga o le malae ona o le au lava e sikoa i sekone ia, o le au manumalo lena, ae o le taimi foi lea ua mafiafia le lelea filemu ane o le puao ma faapepepepe i luga o le malae.
I se faatalanoaga ma Muliaina a o lei malaga atu i Aferika, o le latou formula taua lava o le taaalo loto faatasi, talitonu le tama taalo ia te ia lava, tinou ma mataalia i le 80 minute, ia ona tuu lea i ai ma le latou game plan aua e ese foi le au a le Bulls latou, ma e le gata i le malosi ia maua, ae o le taua foi o mafaufauga ma matematega i luga o le malae. O le alii o Sitiveni ua malolo e le malaga ona o loo lavea lona tauau, sa fesiligia e le au tusitala le alii taalo o le Bulls, Steyn ma le malosi lelei naua o lana kiki polo, ae maise ai o le home advantage, o le tali a Muliaina ma Forster, e fua lava i le ituaiga game plan e o mai ma le Bulls, ae o loo iai foi nai a latou sauniuniga e tali atu ai, o loo iai pea lona faatuatuaga i le backline aemaise ai o le au taaalo atoa, o le isi itu e lelei foi le fai i malae i fafo atu, e atili ai ona toa le loto, ae talosia ia le faagatama ia manuia, o le a tapuaia faiva o tama fanau e le gata i Waikato a o Aotearoa atoa.