O le tele o le koleni ma le gaioi, e faafouina ma faaopoopoina ai pea le malosi. E faatuputeleina foi le fiafia ma leai se itaita gofie. E molimau a le Tusi Sa, o le moe e faamativaina ai le tagata. E tatau lava ona iai sina faamalositino i lau lisi masani o le vaiaso e faapaleni ai le tino.
E iai taimi a tele le galue ua na o le falefaigaluega lava pe faleaoga faasasao i le fale, taumafa, televise, taagulu loa. Ae o loo faamalosia pea e fomai le vailaau aogā ia aua nei misi le faia lea o sina faamalositino.
Ua fa vaiaso talu ona amata le Zumba poo le koleni masani i taeao o Aso Toonai, ae ole uluai po i aso o le vaiaso na amataina i le afiafi o le Aso Lulu 17 o Me. E eseese foi vaega o le ao ma le po i tagata koleni ona e fuafua i taimi avanoa.
O lenei fuafuaga ua faagasoloina, o loo lagolago malosi e le vai faasili malosi o le Mona Vie ma le Frank Frost Taekwondo Australia, e pei ona faalauiloa i luga o le leitio ma faamaite e le Penina o Asuisui.
Ua a‘e se manatu e faia lea faamalositino e fuafua mo nai o tatou tagata e tau le maua ni taimi e koleni ai ona o le pisi i galuega ma aoaoga ae lelei ona faaalu e aunoa ma se totogi e ulu fua lava tagata uma.
E tele nisi o faamalosi tino faapenei o loo faia pea e tai $5.00 tai $10.00 e ulu ai, peitai o le faamoemoe o loo pisapisa ai le leitio i Brisbane e aunoa ma se totogi. E le o tilotilo i le taimi nei ae mo aso o i luma, ma o se faamoemoe e atagia mai le fiafia o le tupulaga talavou aemaise nai faletua ma tausi faapea le itu pa malosi.
E le o toe mamao ona faaalu lea o se isi afiafi ma e mafai ona fua uma pauna i po uma ona e iai le faaailoga faapitoa e faia i le tagata e oo atu i le faaiuga o le tausaga ua tele ona pauna ua lusi.
E le o mailoa poo se pepa malaga fua (free ticket). O le fetalaiga ia Lealofi Lausei Pritchard ma le susuga ia Faalavelave Frost Frost o loo faia lipoti i luga o le leitio ma faaailoa atili tuatusi o nofoaga, ma faamalosia pea tagata e tusa ma nei avanoa matagofie e faalalo ai le tele o pauna mamafa talu le tele o le ga‘o o le fasipovi masima ma le tausami talo ae aunoa se koleni.
O le faletua ia Rosita ma le susuga ia Opetaia Sione o loo feagai pea ma faagaioiga o le Zumba faatasi ma le lagolago a le leitio.
O le ‘afa o le 6 i le afiafi e amata ai le faamalositino i po o Aso Lulu i le “Old Inala Hall” i le tulimanu o Abelia ma Rosemary Street i Inala e le mamao ma le Runik Polynesian Town, ae o Aso Toonai o le nofoaga o Acaica Ridge.
O loo faafesootai le numera a le leitio Penina o Asuisui mo nisi faamatalaga o lenei faamalositino, i taimi o polokalame pe faafesootai Lealofi Lausei Pritchard, Rosita Sione poo Faalavelave Frank Frost.
