Malaga helikopa NZ Air Force fesoasoani tamaiti a le Loto Taumafai

O le Aso Lulu o le vaiaso na tea nei na malaga atu ai se helicopa o le fuavalele o le ea a Niu Sila, le Iroquois, mai le Royal New Zealand Air Force, e fesoasoani i tamaiti mamai e le atoatoa le malosi o le tino o le Loto Taumafai i Samoa.
Na taua e le tamaitai kapeteni sa faafoeina lea malaga faapitoa i Samoa, Lutena Anna Shaw, o se avanoa taua tele na malaga atu ai mo le ofoina atu o lea fesoasoani laveai.
O lea fesoasoani, e mai le vaega o fesoasoani a le malo o Niu Sila poo le NZAID.
O le tausaga e 2003 sa amata mai ai le galuega soofaatasi a le NZAID, ma le aoga a le Lotu Taumafai i Samoa.
O lea polokalame fesoasoani, e aofia ai ma le ofoina atu o le itu tau tupe, aemaise ai le talosagaina o auala e faatupe ai ia fuafuaga uma.
E aofia ai i lea polokalame, le aoaoina o tamaiti mo le saogalemu i totonu o lo latou lava siosiomaga, ma le faamoemoe maualuga ia mafai ona maua e nei tamaiti le soifuaga masani e pei ona soifua ai le toatele.
O le talitonuga ma le faamoemoe autu lava o lea polokalame fesoasoani, afai e lelei ona aoaoina i latou nei, o le a tele foi se avanoa e mafai ona toe fesoasoani atu i tagata lautele o le atunuu, aemaise o latou lava aiga.
Na faaalia e le susuga i le ofisa sinia o le aoga a le Loto Taumafai i Samoa le susuga ia Letaa Daniel Devoe, o le taunuu atu o le vaafaaola mai le NZ Air Force, o se avanoa taua tele, ma o se tulaga e faafetai ai lenei galuega soofaatasi ona ua maua ai foi e tamaiti o le aoga nisi agavaa fou latou te lei iloaina e mafai ona latou maua i lenei soifuaga.
O le saunoaga a Letaa Daniel Devoe, sa ia matua faafetai ai i le vaega lenei mai le NZ Air Force, ona o le televave mai tele o le latou fesoasoani mo le Loto Taumafai.
E le o se taimi muamua lenei ua faamanuiaina ai le Loto Taumafai i Samoa, mai fesoasoani a vaegaau a Niu Sila.
O le tausaga e 2008, sa faapea foi ona fesoasoani mai ai le vaega o le fitafita o le sami, poo le Navy a Niu Sila lava, mo ni galuega i le faaleleia o faleaoga atoa ai ma le atinae o tomai o tamaiti mo a latou galuega fai i aso uma.