Malaga autalavou Ekalesia Faapotopotoga Iesu i Niutone mo mafutaga faaleautalavou i Samoa

I le tele o tapuaiga Kerisiano i soo se atunuu e aofia ai ma Niu Sila nei, o se tasi o moemitiga ia Faakerisianoina le tupulaga talavou ma ia fiafia i mafutaga faaleautalavou aemaise le fiafia i tapuaiga kerisiano. I le tausaga nei 2013 i Samoa o loo fuafuaina ai le vaiaso o tupulaga talavou aoao, a le Ekalesia Faapotopotoga a Iesu i Samoa ma Atunuu i Fafo i lona nofoaga autū i Vailima.
O mafutaga faaleautalavou aoao e ta‘i tolu tausaga ma faagasolo i Samoa i lona nofoaga autū lea i Vailima O loo iai foi le autalavou a lenei lava tapuaiga i Magele i le Susuga i le Toeaina ia Elder Rev Mose Tuisaula o loo auai atu i le vaiaso faapitoa faaleautalavou i lenei tausaga 2013.
I le tapuaiga masani la sa feagai ai ma le Ekalesia Faapotopotoga a Iesu i Niutone i Aukilani lea o loo tausia nei e le Susuga ia Rev Rolani Mikaele ma le faletua ia Lemafo‘e, i le taimi o le lotu masani i le vaiaso talu ai, sa maua ai le avanoa e pepese ai le autalavou i viiga e lua o tapenaga mo le faamoemoe i Samoa.
E matagofie lea taeao i le sauniga paia, ona o le sao tāua o le tupulaga talavou, aemaise o se molimau faaleagaga e tauala i pesega faaleagaga i lea taeao. O sauniuniga a le autalavou a Niutone mo lea faamoemoe o loo aofia ai pesepesega faaleagaga, tala faatino, faafiafiaga faaleaganuu Samoa, aemaise faafiafiaga faatupulaga o le fetii o fatuga fou o lenei talutalu fou.
O loo malaga faatasi i le Aso Faraile nei le Autalavou mo Samoa mo lea faamoemoe, i lalo o le taitaiga a le Peresitene ia Levi Tusa aemaise le susuga i le Faafeagaiga ia Rev Rolani Mikaele ma le faletua ia Lemafo‘e, faatasi ai le lautele o le Ekalesia i mātua ma aiga.
O loo iai le faamoemoe e lua vaiaso o le faigamalaga ona toe taliu mai ai foi lea i fanua mo isi galuega faaleautalavou. A mae‘a le vaiaso faapitoa o tupulaga talavou i Samoa, ona alo atu loa lea o le Ekalesia i lana fonotaga Aoao i Samoa ma taualuga ai lava i le nofoaga o le Ekalesia i Vailima.