O le sui faipule o Vaisigano numera tasi Tufuga Gafoaleata Faitua ua ia fautuaina le Malo ina ia toe tatala nisi o atina‘e e pei o le uafu ma le malaevaalele o loo i Asau, ina ia faafaigofie ai feoaiga ma isi fuafuaga tau pisinisi i lona itumalo.
O le tasi lea o faipule na filifilia i le palota laitiiti a lea itumalo ina ua tuanai faamasinoga o tagi o le palota tele talu ai lea na soloia ai le nofoa o lē sa filifilia i le palota tele le afioga Vaai Papu Vaelupe ona o moliaga o faatosina solitulafono. I lana saunoaga faataupou i le fonotaga i le vaiaso nei a le Palemene sa ave ai ma se talosaga a le sui faipule i le Malo ina ia toe silasila ane i le iai o se nofoa faaopoopo o le itumalo o Vaisigano Numera Tasi.
O le sui faipule o Satupaitea se isi o nofoa na toe filifilia i se palota laitiiti ona o iuga o faamasinoga o le palota, na ia folasia i le maota fono se talosaga e avea ai lona itumalo ma nofoaga e faatuina ai se falemai ia faigofie ai mo lea itu o Savaii ona saili fesoasoani mo gasegase, ona ua fai si mamao o Tuasivi o loo iai le falemai autū mo Savaii.
I isi tala o fonotaga a le Palemene o le tau aofiaga ananafi a le fono aoao faitulafono na faasa‘o ai e le sui faipule o Gagaemauga Numera Lua, le tofa Levaopolo Talatonu, le alii Palemia i le faaleoga sa‘o o lona suafa matai o loo avea ai ma sui o lona itumalo i le Palemene.
Faaalia e le sui faipule o le lafoga a le Palemia ua atagia ai ni saunoaga faauigalua.
