Ua leva ona tulimatai mai ma tapena le Ekalesia “O le Upu Samoa Ministry” i le aso faamanatuina o le Eseta e pueina ai a latou sauniga ma tuuina aua le faafofoga a le atunuu e ala i fesootaiga vavave.
O le valu tausaga talu ai sa mafai ai ona momoli ai le upu o le Ola i luga o le Televise i le alaleo o le Brisbane 31 i totonu lava o Kuiniselani.
O le auauna a le Atua le susuga ia Ps Iosua ma le faletua ia Sara Pagaialii ma le Ekalesia sa nafa ma lea foi auaunaga.
O le naunautaiga lava o le auauna e toe faaauau pea e le muta aua e oso pea le la. O le susuga ia Ps Iosua Pagaialii e mai le alalafaga o Lefagaoalii Safune ma le faletua ia Sara e mai le afioaga o Saleaumua ma Mutiatele Aleipata.
O le taimi nei o loo galulue vaavaalua ma le Ekalesia a le susuga ia Ps Faasua & Faasili Seuseu o le AOG itu palagi.
E ui ina galulue i le faamalu o papalagi peitai o loo faaaogaina lava le gagana Samoa e fefiloi ma le gagana Peretania i nisi taimi.
E tusia lenei ripoti o loo pisi le Ekalesia i le pueina o a latou polokalame o le Eseta ua le maua ai se taimi e auina mai ai se tuatusi e maimoa ai i luga o upega tafailagi ae lelei ona valaau le numera lea a le susuga ia Ps Iosua (3814 3933) e tuuina mai le tuatusi e maimoaina ai a latou polokalame.
