Maimau e, le mafutaga pe ana leai le oti!

Le faletua ia Taupisi o le Toga Faamatuainu Moana Tipi


E, ua oo i totoga lagona ootia ma le tiga, ona o le matuitui ma le oona o le tui a le oti! Peitai, ua pei o se puao ua na ona aliali mai ma toe mou atu, lagona o le faanoanoa ma le faavauvau, ina ua faamanatu mai Afioga a le Atua ma faapea mai, O lo‘u nei alofa tunoa, ua lava lea e fesoasoani ia te oe.

O nai toe saafiafiga ia ma moomooga a le tina ia Leata Tipi ma le aiga, aemaise o le susuga ia Tapuai Faamatuainu Faamalua George Tipi ma nai ona alo, ina ua amia e le Atua le tina o le aiga, le afioga ia Taupisi o le Toga Faamatuainu, Moana Tipi.

O iuleo o le alofa, ma le valevale alofa ona o le mafutaga sa mafanafana ma sa mausali i le alofa o le tane i le avā, o le tamā i le tina. Ae pagā lea ua tatala e le maliu, ma ua faateaeseeseina e le oti.

Ae ui i lea, o le toe faamanatu foi a le afioga a le Atua e faapea, “Aua ua ou mautinoa, e le mafai e le oti, poo le ola, poo agelu, poo alii sili, poo e malolosi, poo mea i nei ona po, poo mea atali, poo le maualuga, poo le loloto, poo se tasi mea na faia, e le mafaia e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii.

Aua o lo tatou nuu moni ua i le lagi lea, o loo faatalitali mai ai i tatou i le Faaola, o le Alii o Iesu Keriso, na te liua o tatou nei tino ua leaga, ina ia faia ia faatatau i lona tino matagofie, e tusa ma le mana na te mafaia ai ona faatoilaloina o mea uma ia te ia lava.

O le Aso Faraile na tea nei na faamavae ma faatofa atu ai aiga, uo ma aumea mamae, aemaise o ē masani i le tina o Moana Tipi.

O se tina talavou, a o se tina foi sa iai le meaalofa ma le tomai faapitoa i le galuega sa galue ai i totonu o le Malo o Niu Sila.

O Moana Schwalger Tipi, o se Loia faapitoa i le tulaga o lafoga, ma sa galue i totonu o le Matagaluega o Faamasinoga a Niu Sila, ma o ia o se tasi o uluai tamaitai Samoa Pasefika sa galue i lea lava tulaga maualuga ma le taualoa i le Matagaluega o Faamasinoga e pei ona ta‘ua (Crown Prosecutor with Meredith Connell).

O le Famasinoga Faaitumalo (District Court), o le Faamasinoga Maualuga (High Court, faapea ma le Faamasinoga o Apili (Court of Appeal). Sa galue foi i le Community Law Centre i Grey Lynn. O ia foi o se sui sinia o le Asosi a Loia o le Pasefika (Executive member, Pacific Lawyers Association).

Ua faaipoipo atu o ia i le afioga ia Tapuai Faamatuainu Faamalua George Tipi, ma e toatolu o la alo.

O le atalii ia Benedict (Tito) Leroy Tipi, o le teine o Grace Ioana Tipi, ma le isi atalii o Faamalua Jacob Tipi. O le susuga ia Faamalua sa avea o se tama taalo mo le Manu Samoa i tausaga ua mavae.

Na matuā faatumulia le malumalu o le toeaina ia Rev Elder Famalua Peteru i Henderson i le toatele o sui o le Matagaluega o Faamasinoga mai Ueligitone ma Aukilani sa auai ai. Sa faapea foi ona auai le Sui Faipule o Te-Atatu, Phil Twyford ma le tofa ia Su‘a William Sio, le Sui Faipule o Magele.

O auauna a le Atua ma aufaipese eseese sa faatasi uma i ai, o nisi o uo ma paaga mamae a le faletua ia Moana.

Sa faailoa foi le agaga ootia o le afioga ia Lemalu Hermann Retzlaff, o le Peresetene fou o le Asosi a Loia a le Pasefika, faapea le komiti faafoe ma sui uma o le PLA.