Fealualuai solo ma se laau malosi i luma o falekalapu
O lea mataupu ua molia ai se alii 27 tausaga o Taufusi i le moliaga o le umia o se aupega faasāina. E faapea se faamatalaga, sa vaaia lea alii ma le laau malosi i luma o le falekalapu o le Club X ma na ia faasiilima ai nisi o alii sa i luma o le falekalapu i le po lea e aofia ai ma le faasiilima o se alii Matautu-tai.
Sa logoina le Matagaluega o Leoleo e se alii leoleopo o le Club X, ma agai atu ai loa Leoleo e fesoasoani.
Faaalia e se tasi o alii na iai i lea po, sa tuli mai e Leoleo lea alii ae sa ia togi le laau malosi lea e faapea o le ituaiga o le 38 revolver i le sami ina ua maua e Leoleo. O lea alii ua molia o Francis Mika ma o loo tālia le aso e valaau ai lea mataupu i luma o le Faamasinoga.
Leai se isi ua molia mai Satapuala
O loo tālia pea suesuega e tusa o le mataupu na tulai mai i Satapuala i le Aso Tofi o le vaiaso na te’a nei, faato‘ā faia ai loa se faaiuga a le Matagaluega ia i latou e ono molia ai. Saunoa Leaupepe Fatu Pula, Sooupu o le Matagaluega o Leoleo, se‘i fai muamua suesuega.
O le tulaga foi ua iai lea mataupu, o loo faaauau pea le tiute a Leoleo i le Ofisa i Faleolo mo le saogalemu o tagata o loo faagaioia le galuega o le falemai, ma e leai se vevesi o tulai mai.
Faaopoopo i latou e molia i poloka a Leoleo
O le faaauau ai pea o le auaunaga a le Matagaluega o Leoleo, e faatino i taimi o le po aemaise lava i faaiuga o vaiaso, o loo matauina ai le faaopoopo pea o i latou e molia mai ai i le tagofia o le ava malosi ma faafoe taavale.
E toavalu sa taofia i le Ofisa i Afega i le vaiaso na tea nei, ma sa taofia ai ma toe tatala i tua e faatali ai aso e tulai ai i luma o le Faamasinoga. E fautuaina lava e le Matagaluega, le nofo silafia e le atunuu aemaise o i latou e faafoeina taavale ae o loo tagofia le ava malosi, o le a lē ‘alo le faatinoina o tiute o Leoleo, ma e molia ai i lea soligatulafono.
E faatāua pea e le Matagaluega le saogalemu o le mamalu o le atunuu, ma le taofia o le tutupu mai o faalavelave faafuasei i luga o le auala ma aafia ai le mamalu lautele o loo femalagaai i soo se itu o le atunuu.
4 tausaga maliu i se faalavelave tau taavale
O se tamaititi 4 tausaga na malaga mai Manono agai i Utualii, lea ua maliu ina ua lavea i le taavale a le alii 42 tausaga lea ua molia i le ave taavale faatamala ua mafua ai le maliu. O lē ua molia o Talisolia Aiono mai le afioaga o Fasitoo-uta, lea ua molia i lea faalavelave.
E faapea se faamatalaga, o lē ua maliu, sa oso i lalo ma le pasi na agai mai ai, oso i lalo ma kolosi loa le auala, ae lavea ai loa i le taavale a lē ua molia. Saunoa le Sui Sooupu o le Matagaluega o Leoleo, Leaupepe Fatu Pula, e tatau ona toe tagatagai ma faatāua e avetaavale tulafono o le auala. E lē tatau ona soona saoasaoa se taavale na te pasia le isi taavale aemaise lava i pasi, auā e mautinoa e iai le tagata kolosi.
O le isi itu, o nisi o afioaga e le’i iai ni falefaatalipasi, ma e na o nofoaga o loo iai fale faatali pasi o loo faamalosia ai le tulafono mo pasi e tuu ai a latou pasese.
O loo galulue faatasi le Matagaluega o Leoleo ma le Matagaluega o Taavale afi (LTA) e tusa ai o ia mataupu faatasi ai ma le tulai mai o nisi o faalavelave tau taavale ma aafia ai le soifua o le atunuu.
