Foai nisi breathalyzers mo poloka a Leoleo
O se tasi o auaunaga a le Matagaluega o Leoleo o loo faatautaia i faaiuga o vaiaso, o le poloka o magaala e le gata i totonu o le taulaga ae o tua foi i nuu.
O lea taumafaiga, ina ia mautinoa le saogalemu ma ia faaitiitia ai le tulai ai o faalavelave e aafia ai le mamalu lautele o le atunuu. E lua la ni breathalyzers poo masini e siaki ai le mānava a i latou e tagofia le ‘ava malosi ua foai i le vaiaso nei e le Ofisa o Leoleo a Ausetalia i lana faiga paaga ma le Matagaluega o Leoleo a Samoa, ina ia faaauau ai ma faaleleia le auaunaga o loo faatino i faaiuga o vaiaso aemaise o taimi e manaomia ai.
Talu ona fai poloka nei a le Matagaluega, e 124 sa faamauina le tagofia o le ‘ava malosi, ae e 14 na molia ai i le faafoeina o taavale afi ae o loo faasuaava. E iai foi ma le isi toatolu na molia ai, i le lē usitaia o le faatinoga o tiute a Leoleo mo le siakiina o le mānava.
Ua faasafua atu nisi o masini mo ofisa o Leoleo i nuu i tua ma e faafetaia ai e le Sui Sooupu o le Matagaluega o Leoleo, Leaupepe Fatu Pula le fesoasoani mai a Ausetalia, o le a faaleleia atili ai le auaunaga a Leoleo ma ona tiute fai.
Leai se fesootaiga o taaloga afereti ma fusuaga a Aoga
O le vevesi na tulai mai i le va o le Kolisi a Avele ma le Kolisi o Sagato Iosefa, ua faamaonia mai e le sui sooupu o le Matagaluega o Leoleo, e leai se fesootaiga i taaloga afereti a aoga maualuluga.
O taaloga sa faatautaia, sa mae‘a ma saogalemu e lei tulai mai ai se vevesi ma sa fesoasoani foi le Matagaluega o Leoleo i le galuega a alii ma tamaitai faiaoga mo le tausia o le filemu. Peitai, o le vaiaso nei, na tulai mai ai se vevesi i le maketi i Savalalo ma ua molia ai nisi o alii aoga.
E toafā tamaiti Sagato Iosefa ua molia ai faatasi ai ma se alii e aoga i le Iunivesete Aoao o Samoa e le o mautinoa poo fea le aoga sa aoga ai. Ua molia ia alii i moliaga o le tauai maa, faaoolima faatasi ai ma le sese o faamatalaga sa tuuina i Leoleo i le taimi na tulai mai ai lea vevesi ma suesueina e le Matagaluega.
O se tama e 61 tausaga sa iai i le nofoaga na tulai mai ai le fusuaga a aoga nei, ae o le tama aoga Avele lea na faaoolima i ai alii o le Kolisi o Sagato Iosefo o lea ua faaalia e Leoleo ua ivi lona mata ma na fasi lea tama a o i luga o se pasi na fuafua e agai i Alafua.
O sana suesuega o ana meaaoga na agai ai lea alii Avele i le pasi lea ae osofai ai loa e tama o le aoga o Sagato Iosefo. O isi alii e toalua mai i Avele faapea na aafia ai foi i lea osofaiga mulimuli ane, ua togafitia ma ua tea i tua. Pau se faamatalaga na tuuina mai e le Matagaluega, na mafua ona tupu le feeseeseaiga i le va o ia aoga ona ua fasi se alii Sagato Iosefo na aoga muamua i Avele.
A faamaonia moliaga ua molia ai ia alii e toalima, e 12 masina se faasalaga faafalepuipui e tuu i ai, poo se sala tupe foi e totogi. O le osofaiga lenei na fai i le Aso Faraile lea na toe faatautaia ai afeleti a aoga i le mae‘a ai o tapu a le Malo talutalu ai lava le fufusu o tama aoga. Peitai na ta‘ape lava le Apia Park i le Aso Faraile o malupuipuiga ma leoleoga a le Matagaluega o Leoleo ma Falepuipui, peitai na agai i le taulaga ma tulai mai ai loa nei vevesi. O le Aso Gafua o le vaiaso na tea nei na toe vevesi ai loa ma aafia ai loa le tele o aoga i tauaiga maa ma atigifagu i tua o le nofoaga faatali pasi i Savalalo.
O le tala a le alii Palemia, ua tatau ona toe faaolaola le sasa o tamaiti aoga ma ua faamalosia lava le tutuli ese o i latou ia e faia lava nei faiga o le lē mafaufau ma faatupu vevesi i nofoaga faitele o le atunuu.
Lavea i se taavale ma maliu ai
O le alii o Paulo Chadwick, 23 tausaga o Samea, lea o loo masalomia e le Matagaluega o Leoleo na maliu ina ua oso ai se taavale a o moe i luga o le aualatele. Sa taoto lea alii i luga o le auala e faafesagai tonu ma le malaevaalele ma e faapea se faamatalaga sa faatali i se tasi o ana uo. E le o mautinoa le taimi tonu na tulai mai ai lea faalavelave ae pau itu ua faamaonia mai e le Sui Sooupu o le Matagaluega, e lei faasuaavā le avetaavale o le taavale na lavea ai le ua maliu faatasi ai foi ma lē ua maliu.
O lea faalavelave, ua molia ai se alii 23 o Samea i le moliaga o le ave taavale faatamala ua mafua ai le maliu ma o loo tālia le aso e valaau ai lea mataupu i luma o le Faamasinoga. O loo maua ripoti faapea na faatali lē ua maliu i sana uo e faigaluega i le malaevaalele faavaomalo i Faleolo ae ai o le moe ai ua leiloa ai lava le taia e le taavale.
O se isi foi faalavelave faapea lea na maliu ai foi se alii Savaii i Pu‘apu‘a i le tausaga na tea nei. Ua alu ane moe i luga o le auala e faatali ai le pasi o le vaa e agai i le uafu i Salelologa mo le malaga o le taeao ae uma ane ua soli e se loli na faapea foi ona faatatope ane e agai i le uafu mo le uluai faigamalaga a le vaa la‘u pasese o le taeao mo Upolu. Na taia ai lava lenei alii o moe i luga o le alatele ma maliu ai.
O le fautuaga ua faia e le gata i tagata e lē o lagona le matautia o le moe i luga o le auala ma avetaavale ia mataala i taimi e femalagaai ai, ina ia taofia le tulai mai pea o nei ituaiga faalavelave e maumau ai soifua o le atunuu.
