Ua mapu atu i lona aiga i mafatiaga mai gasegase ua aafia ai le tofa Le‘afa Vitale sa avea ma faipule o Sagaga Le Usoga, ma avea ai ma Minisita o Galuega, EPC, Falemeli ma Fesootaiga, faapea ma le Matagaluega o Tina ma Tamaitai.
I lona faasalaga soloatoa i le falepuipui faatasi ai ma Toi Aukuso Cain sa avea foi ma faipule o Faleata i Sisifo ma avea ai ma minisita o le kapeneta, sa tele se taimi sa aafia ai Leafa i gasegase ma i‘u ai ina lē toe mafai ona savali ae faaaogā se nofoa faataavalevale i totonu o le falepuipui i Tafaigata.
O Le‘afa ma Toi Aukuso Cain, faapea le atalii o Leafa le alii o Alatise Vitale na faasalaina i le oti ma liliu ai lea faasalaga i le soloatoa i le toese, ona o le tagatavaleina o Luagalau Levaula Kamu sa avea ma faipule o Salega, ma filifilia ai e avea ma Minisita o le Matagaluega o Galuega a le Malo.
O lea faalavelave na tupu i le tausaga e 1999, lea na fana ai e Alatise, Luagalau a o faia le fiafia o le aso fanau o le vaega faaupufai o le HRPP i le maota o le Kolisi o Sagato Iosefo i Alafua.
O le Aso Lua na tea nei, 29 o Iuni 2010 na faaiuina ai le fono a le Komiti o le Palola na ioeina ai le magalo i tua o Le‘afa ina ua silia i le sefulu tausaga o lona faasalaga soloatoa.
E lei maua se faamatalaga mai le Komiti o le Palola poo ā mafuaaga na faavae ai le latou faaiuga, ae o loo iai le talitonuga o le matua o le soifua o Le‘afa faaopoopo i ai ma mafatiaga i ma‘i o le tino ua aafia ai, o le pogai lea ua faasaoloto ai ma mae‘a ona tuli lona faasalaga.
E masani i tuutuuga ma aiaiga e magalo ai se pagota i le palola, ona nofo vaavaaia pea mo se vaitaimi.
O le Aso Lua na faia ai le faaiuga e magalo lea tamalii, na tea ai i tua ma le falemai i Motootua.
O sailiga i le fia maua o se faamatalaga mai le sui sooupu o le matagaluega o leoleo e lei manuia.
Ae na faaalia e se leoleo o le falepuipui i Tafaigata, e lei toe foi atu le siiga ma‘i a Le‘afa i le toese ina ua maua le faaiuga a le Komiti o le Palola. Sa tele faiga faaalatua ma faiga faapiopio na alia‘e mai i molimau o le faamasinoga o le tagatavaleina o Luagalau, le mafuaaga na taupulepule ai Le‘afa ma Toi e faatino le solitulafono, lea na faatonu ai e Le‘afa lona atalii e faataunuu le faalavelave.
O se faalavelave sili lea ona tugā ma matuiā ua aafia ai le li‘o o upufai o Malo o Samoa talu ona tutoatasi. Talosia ia lē toe tulai mai i le lumanai.