O se tasi o tamā ua 45 tausaga le matua sa galue ma tautua i le tofi faifeau fesoasoani o le Ekalesia Katoliko, le susuga Lafaele Suluape Talatonu, sa tulai i le faamasinoga maualuga e tali i le moliaga o le taumafai e faaoo le oti i se tamaitai sa la mafuta faaleulugalii.
O le molimau a le tamaitai o Sui Tuiafiso na ia ta‘ua ai, sa tutu e lē ua tuuaia se laau afitusi ma susunu ai le la taavale sa iai i totonu, i lona talitonuga maumaututu o se taumafaiga a lē ua molia e faauma ai lona soifua.
Faaalia e le tina sa muamua lava fusi atu o ia e Lafaele ma faapea atu, e manao e faauma o la ola i le gaioiga lea na susunu ai le taavale, peitai ina ua mumū ma talalī le taavale na oso i fafo Lafaele ae o ia o loo saofai pea i totonu ua afaina lona tino, ma sa taumafai loa e alu i fafo.
O loo teena malosi e lē o loo tuuaia le moliaga i lana faamatalaga i le faamasinoga, e lei iai se la talanoaga ma Sui na ia ta‘ua ai sona faamoemoe la te feoti faatasi i le susunuina o le taavale. Faaalia e Lafaele na faalogo Sui i le la talanoaga ma se tasi o ona uso, sa ta‘ua ai lona manao e fia alu e asi ma vaai lana fanau ae na toatamai ai lē ua tagi faasaga atu ia te ia.
Faalēaogā moliga
O le taunuuga o galuega a le faamasinoga i le mataupu lenei ua lē mafai ai e molimau a leoleo ona faamaonia le moliaga o le taumafai e faaoo le oti sa molia ai Lafaele Suluape Talatonu. O le mae‘a ona fofogaina o molimau na iloilo ai e le laulau a faatonu le panel of assessors, molimau a le itu tagi le tina o SuiTuiafiso Ta‘ulelei o Foailuga i Savaii, faapea molimau a lē na tuuaia lea sa ia matuā teena moliaga a leoleo. O le moliaga o le susunu taavale ma le moliaga o le faaoomanu‘a.
O Lafaele Suluape o Faleaseela i Lefaga na molia ina ua faamatala le tamaitai o Sui sa la feoai faapouliuli, sa na susunu le la taavale ia Iulai o le tausaga na tea nei ma le faamoemoe e faauma ai lona ola.
O le tali lea mai le Atua ua faaalia i le mea moni ua aumai, e pei ona saunoa Lafaele i tusitala ina ua mae‘a lona faamasinoga. O se avega mamafa foi ua aveese atu ma ia ma lona aiga ona o lea ua faamamā lona suafa mai le tuuaiga na faia.
O le mataupu lenei e fā aso sa suesueina ai molimau i luma o se laulau o faatonu ma faia ai le faaiuga e lē faamaonia le tuuaiga na tuuina atu i leoleo.
