O le ‘anofale o fale o fanau, o le faamoemoe o le faleaoga, e gapatia ai faiaoga e atia‘e aoga a nai fanau ina ia a‘oa‘oina ‘anoaiga (o fanau ia) mo aiga ma le lumanai, auā a lelei aiga, ua maua nuu lelei, a maua nuu lelei ua maua malo lelei ma le Ekalesia lelei.
Faiaoga e, alo ane laia i ou faiva alofilima e faufau ma mamanu fanau, le ‘anoaiga ma le ‘anofale o le faleaoga.
O le afiafi o le Aso Faraile 19.11.2010 na faatasia ai le komiti faafoe aoao o le Sosaiete Aoga Amata Samoa i Aotearoa (SAASIA) i Kalaiesetete mo le latou fonotaga faaiu o le tausaga e faatino ai fetufaaiga mo lea itumalo i le motu i Saute.
O le ofisa tutotonu o loo faafoeina e Sala Faasaulala Tagoilelagi Sala (taitaifono), Tulimalefasi Tanielu-Dick (failautusi) ma Sofaea Penn (teutupe).
O le tausaga muamua lenei ua amatalia ai galuega faa-SAASIA i soo se itumalo o Aotearoa mo le faaleleia atili o pulega aemaise le faalauteleina o le silafia o faiaoga Aoga Amata i la latou galuega.
A o lei amataina le fonotaga sa muai taitaia i le tatalo faafetai na saunia e le faletua mālōlō o Mere Autagavaia (Aukilani) ona faagasolo loa lea o polokalame, e pei o le toe tilotilo o le komiti pe na sologa lelei le faatinoina o galuega a le SAASIA i lenei tausaga, atoa ma le toe tagai i luma i nisi auala fia faaleleia.
Na taape i tofaga i le taimi o le 11.30pm i le po ae o le afiafi foi lea na faateia ai si aumalaga mai Aukilani i nai lulu laiti faamafuie ua masani ai lenei aai.
O le taeao o le Aso Toonai sa faapolokalamaina i le faatinoina o le faasoa a le tamaitai o Vailoa Milo-Harris (Aukilani), o ia o loo galue faapitoa i lalo o le konekarate mai le Ofisa o Aoga mo mataupu faapenei.
O le autū o lana mataupu “Iloiloga o faatinoga o galuega a faiaoga” (Performance Appraisal) sa faamamafaina ai se aogā o le galuega a oe le faiaoga o faia i totonu o le aoga.
Na mālōlō atu i le taumafataga o le aoauli toe sosoo ai ma le faasoa a le faletua Lea‘utuli‘ilagi Sauvao (Ueligitone) i lana mataupu ua faaautuina “Faagasologa o fanau mai Aoga Amata i le Aoga Tulagalua” (Transition: EEC – Primary).
E matagofie fetufaaiga sa faaalia, e pei ona auai ai alii ma tamaitai faiaoga, faatasi ma komiti faafoe mai aoga amata eseese o Kalaiesetete.
Na faatasia ai foi i lea mafutaga faiaoga Samoa o loo galulue i aoga amata itupa palagi, o le agaga fiafia foi lea o le mafutaga o le galulue faatasi.
Na faalauiloa mai e le faletua o Ruta, faiaoga o Kalaiesetete le ‘anoa ma le ‘oa o mafaufauga i le latou mafutaga faaiu. Tele se mea taumafa mo le mafaufau sa afifiina i lea aso, o le feedback na maua ia faamalosia ma saga faaauauina pea nei mafutaga a faiaoga ma Komiti Faafoe mo le saga atina‘eina pea o le galuega a‘oa‘oina o fanau iti (professional development).
Na faaiu manuia le latou mafutaga mulimuli o lenei tausaga i le tatalo na saunia e le faletua o Elisapeta Vili mai le EFKS Wooston Kalaiesetete.
