E faalagolago le malosi o Ekalesia i le fautua a tamaalii ma le mamalu o soifua matutua, ae o le lumanai oloo i alo ma fanau talavou, e mataitu faafeagaiga ma taitai i polokalame e faaauupegaina ai talavou mo lo latou taimi, ma e fesoasoani tele polokalame e maua ai le malosiau faaletino aemaise o le matua faaleagaga.
Na amataina le mafutaga soofaatasi a autalavou a le Ekalesia Aso Fitu Tutoatasi i Vitoria, i le afiafi o le Aso Faraile, aso 29 o Iuni ae faaiuina i le Aso Sa aso muamua o Iulai.
O polokalame faatino o le mafutaga na aofia ai mataupu faale-Tusi Paia, faafiafiaga ma siva faa-Samoa, o pese faaleaganuu, tala ma aitema faaleagaga. Ua tolu lala o le Ekalesia ua iai nei, faatasi ai ma se tasi o lala ua amata lona atinaeina i le itu i Saute o Vitoria. O le susuga a le faafeagaiga ia Ropati Siatua o le taitai matagaluega o le Ekalesia i Vitoria, ae lagolagosua le susuga i le faafeagaiga ia Sani Auimatagi.
E ui lava o le faamoemoe o tupulaga talavou le autu, peitai na maitauina le toatele o mātua na galulue ma faatino faatasi ai i fuafuagafai a autalavou uma.
Atonu o le faamalosiau foi lea i loto o alo ma fanau.
O se tasi o vaaiga matagofie, e ui lava i le malulu o le tau ua iai, ae na molimauina le toatele o tuaa sinasina na afifio atu e patipatia ma molimauina le alofaiva o le tupulaga, ma avea foi ma faataitaiga lelei ma tāua mo alo ma fanau.
Maualuga le viiga o le Alii, ona o le nofolelei ma le fealofani e maua e autalavou mai polokalame fai faapenei.
