E le ‘asa a se atunuu ma ni faafitauli e fai mai foi nisi e sili ā fea ma fea e taugofie le soifuaga, fai mai foi nisi e sili a le atunuu lea e le tele ni faafitauli.
O nisi foi e faapea ane sei tatou sōsō atu i lea setete e lelei e le saosaoa le alu a le faalavelave ma le amio leaga. Soma e, le au uso e, fai mai ai le isi toeaina, poo fea a e te agai i ai e iai a faalavelave ma tele ai Samoa.
Auā o le upu moni ma le faamaoni e iai nisi manatu fai mai e sili a le tatou o i le itu i Matu leaga ua tele foi Samoa i le itu i Saute.
Atonu e leai ni lagona faapena o tutupu a‘e i Samoa i Kuiniselani aua o le a fefe ea e nofo i le nofoaga o iai isi Samoa ae a faafefea? Na tutupu ane lava na o Samoa, ana le o mai a i atunuu i fafo e le filogia le vaai ma le silasila i le mau atunuu eseese.
O le ala foi lea e tutupu ai faalavelave e ala i le fetauai ma femisaai o isi lanu ma o tatou tagata ona e le na o tatou Samoa.
E molimau a foi le Tusi Paia e ala i tulafono. “Aua e te gaoi” pe “Aua e te fasioti tagata” O le tulafono a e mafai ona puipuia mai ai ia vaega e pei ona silafia. E oo foi i sala tau taavale, e iai a sina eseesega laititi o Kuiniselani ma isi setete o Ausetalia e tuu avanoa.
O nisi foi e tele ni vaega o saisaitia ai i lalo lava o solitulafono, ae tauau ina uma ai faamoemoega peitai, o loo taumafai malosi lea mafutaga a le Logan Samoa Advisory Council Incorporated e tuu atu le tauau e faaailoa i nisi o alala i Kuiniselani nei nisi o mataupu tāua ma le ogaoga o loo faatinoina e le Mafutaga e fesoasoani ai i le mamalu o Samoa i lenei foi itu.
O le maea ai o le soalaupuleina ma ua tuumatāmaga ai vaega uma ma fuafuaga a lea foi mafutaga, na tonu ai se finagalo e ao ona sei faaailoa i le mamalu o le aufaafofoga poo le mamalu o Samoa e ala i se faatalatalanoaga i luga o le Siufofoga o le Penina o Asuisui 1197am.
Na taua e nisi o sui sa malaga atu i lea po le telē o se tāua o lea talanoaga auā na molimauina ia te i latou sa valaau atu ma faamalamalama loa i ai lea tautua.
Na momoli le agaga faafetai o i latou nei ona o le auaunaga o loo fai ma puluvaga o i latou ua silafia lea tautua.
E tailua vaiaso ma alu asiasiga a le Mafutaga i le toese e asia nai alo ma fanau Samoa o loo nofosala ai, e le gata i le auina atu o ni vaega o loo latou moomia, ae o le faamamaavega foi ia i latou pe a vaai mai i nisi o aiga ma soo se Samoa e asia i latou.
O nisi o polokalama o faagaioi e le Mafutaga e aofia ai nisi o aoaoga e tai sefulu vaiaso.
E aoga tele ia polokalame ia i latou foi ia e iloa soo i le Court pe molia soo i ni moliaga auā foi a oo ina faauu ma maua se tusipasi, e mafai e le tusipasi lea ona faaitiitia ni faasalaga i lea tagata.
O le tele o tupe o loo avanoa mai i le malo, o loo faigofie ona apalai ma auina mai aua le faagaioiga ma fuafuaga fai a le mafutaga e fesoasoani ai i le manaomia o tupulaga talavou ma isi atinae.
Tulaga tofi o le Mafutaga
Peresitene: Faimalo Faleiva Tau
Sui Peresitene:
Veletaloola Kaleopa
Project Coordinator:
Tauiliili Jeff Reupena
Public Liaison Officer:
Lesa Chang Wai
Teutupe: Anne Siakisini
Failautusi: Site Ah See
