O le taimi muamua lea ua tuufaatasi ai le vaega o Alii ma Tamaitai a le Pulega lenei a Manukau i Sisifo i le taaloga Voli, mai le tele o tausaga talu ona faia nei taaloga, lea e tele ina lua malae e fai eseese ai alii ma tamaitai.
O le Aso Toonai na tea nei na faatumulia ai le fale taalo o le ASB Stadium i Autalavou a Ekalesia e 6 o le Pulega a Manukau Sisifo ona o lea faamoemoe tāua.
O Ekalesia e aofia ai le Faleono lenei o Pakuraga, East Tamaki, Otara, Otahuhu, Magele Sasae ma Magele Sisifo, ma e 4 vaega na vaevae i ai ‘au i le itupa o alii ma tamaitai.
O le susuga lava i le Toeaina o le Pulega Rev Tanielu Lemamea na tatalaina le faamoemoe o Autalavou i le sauniga Lotu e masani ai le fanau a le Atua pe a faatasi, ona sosoo ai loa lea ma le faagasoloina o taaloga taitasi.
Sa matuā felanulanuai le Fale taalo i le matagofie o togiga eseese a Autalavou, ma o se tasi lea o vaega maualuga i le maitau ona o le lelei ona tapena, e lē gata i lea o le toatele o i latou e fiafia i le taaloga voli, aiga uo ma ē masani sa maimoaina le faamoemoe o Autalavou.
O susuga lava i Faafeagaiga sa fai ma Komiti o Taaloga ma fofogaina foi le aso, ma o le ala foi lea o le maopoopo ma usitaia uma foi tulafono o Taaloga ona o le Au Faigaluega, faatasi ai ma le lagolago a afioga i Faletua ma susuga i Taitai o Autalavou taitasi.
E lei alo tamala ‘au uma e tusa ma le maitau i lea aso, lelei uma taaalo a au e lē gata i alii a o tamaitai foi, ia ae peitai o upu lava e masani ai e lē mua uma ni au se lua, e iai lava le manumalo, ia faapena foi le ‘au e malolo.
O le tuufaatasiga nei o ‘au a Alii ma Tamaitai i vaega e 4 na vaevae i ai:
1 – Otara, 2 – Magele Sisifo, 3 – Otahuhu, 4 – East Tamaki & Magele Sasae, 5 – Pakuraga.
Na mae‘a lea aso i le fiafia ma na pogia lava foi le faamoemoe e aunoa ma se faalavelave poo sē na faamanu‘alia, ona toe momoli foi lea o lapalapa o Malo i le faafetai i le Atua, na toe saunia lava e le susuga i le Toeaina o le Pulega ia Rev Elder Tanielu, ma taape ai le fili alii i le alofa o le Atua.
