O le aofia ai o le minisita o le Matagaluega o Puna’oa ma le Siosiomaga i le lisiiina o se fanua faaleaganuu i ni pisinisi mo le fausia ai o se pisinisi, o se tasi lea o mataupu o loo finauina e le SSIG e ala ai ona toe apili le tulafono o le LTRA 2008.
Peitai o loo manino lelei i le saunoaga a le minisita le mafuaaga e ala ai ona manaomia le saini a le minisita ona o le puipuiga o fanua faaleaganuu.
Fai mai le saunoaga a le minisita, o le minisita o le tausimea poo ia lea e fai ma sui o tagata e ana fanua faaleaganuu, o le minisita foi e na te puipuia le soona lisi atu o fanua faaleaganuu.
O le faamalamalamaga mai i le minisita Fiame Naomi Mataafa, afai ae na’o le Sa’o e na te sainia le lisi, ae maliu faafuasei le Sa’o ae lei mae’a le lisi, o lona uiga e okomeki lava le faasee ane o le lisi o le fanua ua lisi i lana fanau poo lona toalua.
O le lisi foi, e pei ona mae’a ona malilie uma iai, e na’o le suafa lava o le Minisita, ma e leai ma ni suafa o nisi matai o tusia ai e aofia ai ma lē e ana le fanua.
O loo aiaia foi i le lisi le mafuaaga o le lisi, pe faatu ai se pou telefoni, poo se pou eletise, pe fau ai se faletalimalo e fua i le vaega o loo iai le fanua e pei ona faatalanoaina.
O le silasila foi a le Matagaluega, o lē e umia se fanua faaleaganuu o lona uiga o le Sa’o, e sui mai i lea taimi i lea taimi, afai la ae saini le Sa’o i le lisi o lona uiga e maliu atu ia ae faasee ane i lona toalua ma lana fanau, ae ua lē aofia ai le aiga potopoto.
Na agai foi le saunoaga a le minisita i le faamalamalamaina o le lē mafai lea e se tagata e leai sona suafa matai, poo se taulealea ona ia faia se lisi e lisi ai se fanua faaleaganuu e tusa lava poo ia o se suli o le aiga e ana le fanua faaleaganuu.
Ua tele foi mataupu faapea ua feeteenai ai sui o aiga ua oo atu i le faamasinoga latou finauga, ma o le mafuaaga lea na ala ai ona afea i le saunoaga a le minisita lea tulaga.
“Afai e iai le faamoemoe o se Sa’o o se aiga e lisi le fanua faaleaganuu, ae fesiligia le pule atoatoa o ia te ia na te sainia ai le lisi, o lona uiga e ao i le matai ona ia faia se faasalalauga, i totonu o le 3 masina. Afai e leai nisi e tetee i le faasalalauga o lona uiga e tatau ona faaauau loa le lisiina o se fanua faaleaganuu mo le faamoemoe mo se pisinisi.”
“Ae afai ae teena e nisi le faasalalauga i totonu o le 3 masina, o lona uiga ua tatau ona tuuina atu le mataupu i le Faamasinoga o Fanua ma Suafa mo lona suesueina.”
“Ma afai ae mae’a le faamasinoga, ona saunia lea o mau faamaonia (proper confirmation) agai i le Matagaluega o Puna’oa Faalenatura ma le Siosiomaga, a’o le’i faagasoloina auala o pepa o le faia o se lisi i luga o le fanua faaleaganuu.”
O loo fautuaina e le Matagaluega o le Siosiomaga le uumi o lisi ina ia faagata mai i le 20 tausaga pe 30 tausaga ona toe iloilo lea o le faaauauina o le lisi.
O le toe iloiloga o le lisi e ao ona malilie uma iai itu e lua o le lisi.
O lona uiga o le tagata e ana le lisi ma tagata e ana le fanua faaleaganuu lea ua lisi. Ma e ao ona tau fai malamalama uma itu uma e lua i tuutuuga e ala ai ona faaauauina le lisi.
Peitai e lē taitai ona faamalieina le finauga mai i le SSIG i lea faamatalaga e pei na ona faanofo filemu ai le mataupu e pei ona o latou finauina.
Fai mai se vaega o le latou finauga o le malosiaga lea ua tuu atu i le minisita e mafai ai lava e le minisita ona sui le lisi, e aunoa ma le maliega mai ia i latou e ana le lisi.
O le tauaofiaga o le fono a le Palemene i le vaiaso nei e faatalanoa ai le mataupu.
