Ua autausagā o feagai tagata o nuu a uta o Fasitoo ma Faleasiu ma faafitauli o le lē maua o se suavai. O lea ua mae‘a ona sua le eleele i vaega eseese o le nuu auā le sailiga o le suavai ae o lea lava e leai se suavai.
O lea ua iai lapataiga ua sau i le Ofisa o le Vaaitau e faapea e oo lava le tau mago poo le El Nino ua feagai nei ma le atunuu i le amataga o le tausaga fou.
O lea foi la ua amata ona vaaia le fai ma pē le paipa i le tele o afioaga o loo maua ai lava le suavai. Mo i latou o loo nonofo i lea itu o le atunuu, ua atili mamafa ai le avega o le tau saili o se vai mo le tausiga i aso uma.
O le tamā ia Taueva Tuloto e nonofo ma lona aiga i Fasitoouta ma ua tele tausaga o tau savali lenei tamā i le ofisa o le Pulega o le Suavai mo se fesoasoani ona o le tau saili o le vai. Ua iai nei lolivai o pisinisi ua faatau atu le tanevai atoa i aiga i le $100 ae o paelo vai e ta‘i $10 tala i le paelo.
E faapea foi pe a agai le aiga i vaega o le nuu i gatai e $10 tala i le paelo vai e tasi auā ua totogi foi le paipa i ia vaega o le nuu.
O le taavale e saili i aso uma e totogi foi ma na talosaga lenei tamā i le Malo mo se faamāmāavega ona ua fiu e tau savali i le Pulega o le Suavai e leai ma se tali mautu ua avane.
E oo atu a tatou ripoti i le fale o lea tamā faatoa mae‘a lava le aisiga mo sina suavai e tunu ai le ti o le taeao, ae o paelo o loo laina i vaega eseese i fafo o le maota o lea tamā ua matuā leai lava se suavai maua.
O le faamoemoe tele o nei aiga o le timu ae o lea ua faitau masina e lē o toe iai se timu e ono tutumu ai paelo ma kalone nei.
Faaalia e Tuloto e lē iloa poo afea o le a maua ai se fesoasoani pe afai o valoaga o tala o le tau o le mago faaauau lea o le ea ma atili ai ona leai se suavai maua.
Faaalia e le tamā lenei a leai lava se tupe i lea aso ua leai foi ma se suavai ma ua agai lava i le aisi mo le suavai maua i lea aso ma lea aso.
Na fesiligia le pulega o le suavai i le mataupu a le tamā ma na ta‘ua e sa‘o o lea ua eli le suavai i vaega o Fasitoouta ae o lea ua faatali nei paipa e ta‘i ai le suavai i maota o aiga.
Faaalia e le tamā ia Tuloto o lea ua ono masina o faatali lava e lē o iai ma se galuega o toe faia mo se suavai e ta‘i atu i fale o aiga.