Ua lē na o se polokalame, ae ua sili atu ma ua o se feagaiga lē motusia ma se faaipoipoga ua faigata ona toe tatala le mafutaga a le matagaluega a leoleo ma le Radio Samoa.
Talu ai ona o le polokalame o loo faaaogāina ai e le matagaluega o leoleo le leitio Samoa i po o Aso Tofi taitasi, ae faamaonia mai e le mamalu o le atunuu e ala i galuega faatino, ua siitia ai foi ma le auaunaga ma le tautua i le va o itu e lua.
O lea ua iai se fuafuaga ma se manaoga mai le vaega a leoleo, ina ia toe sosoo atili lea polokalame, mai le 30 minute sa masani ona faafoeina ai, i le faaatoa o se itula e fai ai.
O se tala fiafia ma o se matagi agi mālū foi lea i fofoga le fia faalogo e ala i se lipoti sa saunia e le susuga ia Talosaga Papaloa, o ia lea sa nafa ma polokalame i le faataunuuina i luga o le ea.
E lē gata i lea, o le susuga lava foi ia Talosaga sa molimauina le aogā tele o le polokalame, i lona agai atu i aiga uma o le atunuu mo le faatinoina o tiute ma le galuega.
Sa ta‘ua e le susuga ia Talosaga le aogā tele o le leitio, ona o fesootaiga mo le faalauiloaina o mataupu, ma tiliva atu ai foi feau eseese mo le lapataia ma le fautuaina o tupulaga ma tagata lautele.
Na faamaonia e le alii leoleo e faapea o fale uma lava ma aiga Samoa e taunuu i ai mo se galuega, e faalogoina ai lava le ola pea o le leitio Samoa.
E masani foi ona faasoa ane le mamalu o le atunuu ma ta‘ua ai le aogā ma le tāua o le leitio, ma le polokalame o loo auauna ai Talosaga. E lē gata o se tulaga lelei ma le aogā ua molimauina e tagata lautele, ae o se molimau ola foi lea mo le susuga i le fai polokalame, ua avea ma faamaoniga o lona taumafai e faatinoina le auaunaga.
O lenei foi polokalame o loo faaaogāina ai lava e le susuga i le alii leoleo le gagana Samoa e fofoga atu ai i taimi uma, o se matuā fesoasoani tele lea mo nai mātua e lē lava le gagana Peretania, ae ua mafai e le talanoa atu a le alii leoleo i le gagana Samoa, ona faamalamalama lelei ai nei mātua le tele o mea e moomia ona latou silafia i le siomaga ma le soifuaga o o latou alo ma fanau, aemaise lava i lamatiaga o loo tulai mai i faiga kegi a le tupulaga.
Ua faamaonia nei e le matagaluega o leoleo le galuega ma le tautua ona ua tulai mai ni suiga i tagata Samoa i le tulaga o le silafia lelei o le tulafono, atoa ai ma faiga solitulafono, ma o se fesoasoani tele lea mo le galuega a alii ma tamaitai leoleo.
