Ua mafai nei ona agavaa le Martin Hautus e faatautaia le aoaoina o le gagana Samoa aemaise o sailiiliga i le aganuu a Samoa. Faailoa e le sui o loo nafa ma lenei faamoemoe, Sooalo Setu Mua, “O le upu a le atunuu…A leai se gagana, ua leai se aganuu…A leai se aganuu, ua po le nuu…” O se fiafiaga sili lea i le mafaufau aemaise o lenei foi auaunaga o le Martin Hautus, o le matala ia sega foi o le finagalo i matagaluega e fitoi tonu i ai lenei matata (NZQA, Matagaluega o Aoga), e ala lea i le mafai ai ona faatino lea tulaga e faaaogā ai le student loan.
E lē o po se lilo i le faigata na asā e le tatou atunuu, aemaise i latou o ē na mua i malae i Niu Sila nei ma amata mai ai le sailiga malo.
Lea ua tatou lē toe autilo ma falolo mai fafo ae ua tatou nutimea faatasi ma faauluuluga o le malo i soo se matagaluega e pei foi ona iai lenei avanoa lē au maua.
O le mafai ona aoaoina o le Gagana Samoa, ma Aganuu Samoa e faaaogā i ai student loans, o se tulaga lelei ma le maualuga lea aemaise i auaunaga o faatinoina e tamalii ma tamafanau a Samoa e pei o le Martin Hautus.
Na ta‘ua e Sooalo, o lenei taumafaiga, ua unaia ona o le maitauina o alo ma fanau e soifua i Niu Sila nei ua mautulaga lelei i galuega a le malo faapea foi kamupani, o nisi ua faaeaina i suafa o aiga ma afioaga, o nisi foi ua faaifo lagi-malofie i laei o le atunuu, peitai ua lē ogatasi ma le malamalama poo le silafia i le gagana aemaise o tu ma aga a Samoa.
Saunoa Sooalo, ‘Ua tatou motu ma le ta‘i ma aitaumalele…ua lē maua ai se punavai o le faavae mautu o le silafia i le faa-Samoa… va fealoai i totonu o aiga ma le vaa taoto i nuu ma afioaga… le malamalama i le gagana o aso uma, le gagana faamatai, le malamalama i alagaupu, i le mafuaaga ma le faaaogāina, le usu i le Aso Gafua a le nuu i vaiaso taitasi e faalogologo ma vaai e pei o le natura o le olaga i Samoa…o le faapusa a le aiga i le vaveao o le Aso Sa, o le faatinoga o agaifanua a afioaga i faalavelave eseese, faatasi ai ma le olaga o aso taitasi e pei o faiva o le vao ma le gataifale…ma le tele o le gaogaosā o le faa-Samoa o loo oge ai nai alo ma fanau o loo soifua i Niu Sila nei.
Ua amata tatala nei la lea auaunaga fesoasoani a le Martin Hautus mo soo se tasi o fia manaomia.
E mafai lava ona agai sa‘o i nofoaga o le aoga a le Martin Hautus, pe fesootai foi i le tofa ia Sooalo Setu Mua (0211041274) ina ia toe faamanino atili lenei mataupu.