O le Aso Sa na tea nei sa fai ai tufagafaailoga a le taamilosaga e sosoo faatasi ai le Tino o Keriso ua faaigoaina o le CEDAR FOR CHRIST GAMES, ma sa faia lea i le malumalu o le ekalesia i le susuga i le faafeagaiga ia Tino Tioa ma le Word of Life i Otahuhu.
E 12 ni ekalesia eseese sa tausinio ai i lenei taamilosaga i taaloga e 5, o le kilikiti, voli polo, soka, lakapi pa‘i, ma le tosogamaea, ma sa faia lea i Aorere Park i le Aso Gafua, Aso Lua, ma le Aso Lulu ina ua mae‘a le Aso Sa o le Tausaga Fou.
O le faaiuga o taaloga, na siamupini le Harbour Praise mai Magele i le kilikiti a alii, ae sola ma le LMS Toefuataina mai Papatoetoe le kilikiti a tamaitai.
O le volipolo na manumalo ai le Heart of Worship (Worship Centre) mai Panmure i alii, ae sola le Word of Life ma le voli a tamaitai.
O voli a le B Grade na suipi uma ai ‘au a Papatoetoe AOG i alii ma tamaitai. O le soka, na suipi ai alii ma tamaitai o le mafutaga a le Hosanna Unity mai Papatoetoe, a o le lakapi pa‘i, na manumalo ai le Au Uso Ministry i alii, ae sola le Every Nations ma le pa‘i a tamaitai. O le tosogamaea na manumalo ai Papatoetoe AOG.
Sa faamanuiaina foi nisi o le fanau mai le 5 i le 12 tausaga i pine auro ma pine siliva ma pine apamemea i tuuga tamoe.
O le faasologa o le tuufaatasiga aoao, ua manumalo ai le Au Uso i le siamupini aoao, tu lua le Papatoetoe AOG o le siamupini talu ai, tu tolu le Jesus Worship Centre, tu fā le Word of Life, tu lima le Heart of Worship, tu ono le Every Nations, tu fitu le Hossana Unity, tu valu le Harbour Praise, tu iva le Peace Chapel mai Magele, tu sefulu le LMS Toefuataina, tu sefulutasi le United Samoan Pentecostal Church, ae tu sefululua le EFKAS mai Kelston.
Na ta‘ua e le faauluuluga o lenei taamilosaga Ps Poni Fonoti, o le autū moni o nei taaloga, o le faailoa atu lea i le lalolagi, e mafai e le tino o Keriso ona galulue faatasi e fausia le malo o le Atua. E pei o upu a Iesu, “e iloa outou e le lalolagi o o‘u soo moni outou pe a outou fealofani.”
Na ta‘ua e le faifeau e faapea, “pe lē soisoi ea le Atua mai le lagi pe a silasila ifo ua fealofani lana ekalesia, ina ua solo i lalo pa vaeloto ae o mai faatasi i le alofa ma le loto e tasi. Ae pe lē mata faanoanoa ea le Atua pe a silasila ifo ua ati a‘e pa e vavamamao ai lana fanau ona o le loto faapito ma le faamaualuga.”
O le susuga i le faafeagaiga ia Rev Otto o le EFKAS na folafolaina le Upu a le Atua i le Aso o le laugatogi, a o le sauniga sa taitaiina e Ps Poni Fonoti, ma na mae‘a lea, ona alo lea o susuga i faafeagaiga ma o latou faletua ma komiti o ‘au taitasi i le taumafataga na saunia e le susuga ia Tino Tioa ma le faletua ma le mafutaga a le Word of Life i Otahuhu.
