O le taleni pese o se meaalofa mai le Atua, e pei ona molimau le Tusi Paia o le matafaioi lea a Agelu o le Lagi, o le lagi fetalia‘i o viiga o le mamalu o le Atua ma lona silisiliese.
E ao lava foi ona sii muamua le faafetai ma le viiga i lana afio ona o le meaalofa ma le taleni e ui lava ina umi se taimi na tapena ma sauniuni mai ai lenei faamoemoe, o se finagalo faaalia lea o le susuga ia Tuli.
Na ia saunoa foi, ua leva ona moemiti mo lenei faamoemoe, o lona soifua e fiafia tele i le musika, ma ua iai ni taimi na mafai ona tautua ai i nisi o faamoemoe faaleaiga ma nisi o uo e ala lava i le pese ma le taleni.
O le Aso Faraile na mae‘a atu nei, aso 24 o Aukuso, na amata faatau atu ai i nisi o auaunaga a Samoa i Melepone le CD muamua lenei, e pei o le Immaculatas Pacific Flavors i Bradmeadows, ae ua iai le faamoemoe o le vaiaso fou o le a oo atu ai i isi setete o Ausetalia, ma faasolo atu ai lava i Niu Sila ma si o tatou atunuu pele o Samoa.
Na ta‘ua e Tuli e lei faigofie, ae na faamoemoe lava i le fesoasoani a le Atua aemaise le tina o le aiga ma nai ona alo e pei ona latou pepese ai i le CD, aemaise foi o le fesoasoani malosi a le susuga a Levae Levae o le Levina Records i Melepone ma lana taleni na pueina ai le CD.
Na ta‘ua foi e le susuga a Tuli, o se tasi o tamalii pese lauiloa o le atunuu na faamalosiau ia te ia ina ia tau lau o le faamoemoe, o si ana uo mamae le susuga ia Richard Parker. E momoli ai lana faafetai i ona aiga uma ma ana uo mo le lagolagosua, aemaise o le mamalu ma le paia o Samoa o le a faatāuaina lona taumafai. Faatau ma faafofoga i ana fatufatuga. O lona faamoemoe a umi pea le soifua, e taumafai mo le CD lona lua ma faaauau ai pea.