O le alii loia o Roman ma lona loto faananau ia Oketi o se tasi lena o vaaiga i le Matai 11

O le alii loia o Roman ma lona loto faananau ia Oketi o se tasi lena o vaaiga i le Matai 11

O le Aso Tofi 20 o Tesema ua faamoemoe e amata faatau atu ai i tua le Vaega 11 o le ata tifaga o le Matai. O le vaega 11 o le Matai na pueina i totonu o Aukilani ma Brisbane Ausetalia. Sa taumafai lava le South Seas Pictures e tapena le Vaega 11, ina ia fetaui ma faigamalologa o le Kerisimasi, o se agaga fiafia lea i le pulega, ina ua mafai ona tali atu i le manao o le atunuu aemaise paaga a le Matai, o lea ua mautinoa o le aso 20 o Tesema o le a faatau atu ai le Matai 11 a’o lumanai ai malologa o le Kerisimasi ma le Tausaga Fou.

O loo tuufesili lava le toatele, pe taunuu le faaipoipoga a Ulisese ma Fetuleni lea na amata ona faatalanoa e aiganalua i le Vaega 10. E lē gata i lea, o le alii loia o Roman lea ua amata ona tuu tuu atu lona agaga ia Oketi, pe faamata e ono gau iai le loto o Oketi ae sameme ai Safuiane?

E pei ona silafia e le toatele aemaise paaga a le Matai, o le ata lenei, e tele vaega eseese o le soifuaga o loo agai iai. O se isi itu tāua o le ata lenei o loo taa’ina iai le toatele o le au matutua, o le aganuu o loo aumai e le Matai, aemaise le va nonofo o aiga ma mea nei o Sa’o o loo tausia nuu ma le aiga.

Ua mae’a ona fai tofiga a Safuiane ia Pu’e i le Vaega 10, ae o le Vaega 11 e feagai ai foi Safuiane ma isi lu’itau faasaga i ana tofiga, e lē gata mai totonu o lona lava aiga, ae o tagata o Pu’e o loo nonofo ma aumau i atunuu i fafo. O le avea o se tagata ma Sa’o o se aiga e lē o se tofiga faigofie, peitai, o loo momoli mai e le Matai 11 le vituti e sili ona tāua i soo se matai Sa’o o se aiga, o le vituti lea na faaaogā e Safuiane e fofo ai le lotoifale o lona aiga, ina ua sa’i nisi i ana tofiga na fai mo Pu’e.

O le vaega foi lenei o le Matai e tagi masusu ai Pulusi ona o le faaiuga na faia e lona tina ua maliu ia Vaitupu; o le ā lea faaiuga a Vaitupu? E te maua le tali pe a e maimoa i le Vaega 11. Ae manatua foi o Sio lea na faamave ia Sina, o ia ua fia alu e sue Fuifui lona tamā mo’i. Faamata na oo ona alu Sio, mea ane o lea na lapataia e Pulusi, e aua ne’i alu auā e iai se mea matuia e tupu ia te ia pe a alu? Na ta’ua e le tofa  ia Fiu Tanupo Fogalevai Lemalu Aukuso, o le Tusitala ma le Faatonu o le ata tifaga e faapea, “O se ata manaia tele le Matai 11, e lua itula le umi o le ata, o le a faamalieina foi le maimoaga a le atunuu, o nisi foi o fesili ua leva ona taumatemate iai le toatele, o le a maua tali o na fesili i le vaega lenei o le ata tifaga.

O le a mafai ona faatau faatasi i tua le Matai 11, i faleoloa ma nofoaga masani i totonu o Niu Sila faapea foi Ausetalia i le aso 20 o Tesema, se’i vaganā ai Samoa ma Amerika o le a maua i le aso 21 o Tesema.

Afai e faigata ona e malaga mai i se faleoloa e faatau ai sau DVD, pe lē maua foi i le pitonuu o loo e alaala ai le ata, e mafai ona totogi ma e maimoaina le Matai 11 i luga o le upega tafailagi o le https://samoavisual.nichevid.com. E mafai foi ona oka mai sau DVD ona lafo atu lea pe a asiasi ane i le https://samoanmovies@bigcatel.com.

Avea foi lenei avanoa e momoli atu ai le faafetai tele a le South Seas Pictures, i la outou lagolago mai Samoa e ala i le faatauina o ana ata tifaga. Faamagalo foi se lape o le tautua, auā e leai lava se tautai e atoa atu o lona vaa. Ae momoli atu moomooga alofa ma faamanuiaga a le South Seas Pictures, mai ona Faatonu ma le Pulega mo oe Samoa le atunuu pele, ia maua se Kerisimasi filemu i le alofa o le Atua, ma ia tatou aulia ma le fiafia le 2019. …

Faamatalaga na tuuina mai