Ua taoto nei i le faamasinoga e faia sana iloiloga maeaea i molimau ua mae‘a tuuina atu e le itu a leoleo faapea molimau mai le itu o loo faasaga i ai moliaga o faiga faatosina i le palota tele i le tausaga ua mavae, lea o loo molia ai le afioga i le Aloalii Vaai Papu Vaelupe.
O loo molia Vaai Papu i le tuuina atu o se tinoitupe e limaselau tala i le komiti a tina o Asau o se komiti o tina faipisinisi.
O loo tuuaia foi i le ave o le fagu malosi ma le tupe e 300 tala i se matai tulafale o le nuu o Asau.
O nisi o tuuaiga o lona ave o tupe ma le ava malosi i nisi o le aupalota a o loma le palota ia Mati o le tausaga na tea nei.
O tuuaiga nei sa suesueina i le tagi a Tufuga Gafoaleata ina ua mae‘a le palota ma sa faamaonia ma faaleaogaina ai le filifilia o Vaai i le tofi o Vaisigano Numera Tasi. O le komisi suesue o loo toe silasila i le tulafono o faigaplota na molimau ai se tasi o sui faipule ma ia faailoa i le komisi ua tatau ona soloia ma le tulafono o palota aiaiga o faatosina, ae tatala ae ia fua se maualuga o se seleni e tatau ona oo i ai faatosina a se sui tauva.
Na molimau foi lea sui faipule e fiu lava e faatulafono faatosina e leai se isi e sao mai i le ave o tupe ma meaai faapea taumafa i tagata palota.
O le aso 18 o le masina fou o Me e lau ai se faaiuga a le faamasinoga i moliaga o Vaai Papu Vaelupe ma lona tuafafine o Foilagi Masoe o loo molia i le faia o faatosina faaalatua.
