Ekalesia EFKS Southwest Brisbane – $1.4miliona
Ua lē gata ua tu matila le ‘olo o le Atua e pei ona faaulufaleina ia Aukuso 2010, ae ua i‘o foi le upega o le tautai ma ua mapu i fanua ina ua mae‘a le galuega tele sa gapatia ai le Ekalesia EFKS a Southwest ma le susuga i le Toeaina ia Rev Taua‘aga ma le faletua ia Senerita Mataafa.
E matagofie le lotogatasi ma uulima faatasi auā e māmā ai se avega.
E lē gata o le susuga i le Toeaina ma le faletua, ae o matafale taitasi, ae lē faafiti foi le lagolago malosi a nisi o toe ulutaia faapea le Toeaina penisione manumalo malolo ia Samuelu ma Tima Tu‘iai na uluai asaina le gasū o le taeao i Kuiniselani.
O le Aso Toonai 10 o Novema na faia ai le tausala a le Ekalesia e sailia ai se seleni e faamae‘aina ai le tau atoa o le falesa.
E $250,000.00 (luaselau limasefulu afe tala) le aitalafu na totoe mai ina ua mae‘a le faaulufalega i le 2010.
O se seleni na manaomia i le Aso Toonai na faia ai le tausala, na o le $57,000.00 (limasefulufitu afe tala) ae o se alaga fiafia ina iu manuia sailiga a le Ekalesia ma o latou tauaaoina ai le taulaga paia e $103,619.85.
Na faaavaava ma fuafua mamao le paia i le Ekalesia i le Aso Sa 18 o Novema e faia ai se sauniga o le agaga faafetai ma susunu ai pepa o le aitalafu ua mamā ma leai se mea o totoe.
Na faatinoina lea i le lagiina o le viiga e le paia i le Ekalesia ma le mamalu i le auvalaaulia ae susunu e le toeaina penisione manumalo ia Rev Samuelu ma le faletua ia Tima Tu‘iai nei pepa. Sa auai le tele o faafeagaiga o le Pulega a Saute ma faletua i lea sauniga faafetai. O le susuga i le toeaina ia Rev Tauaaga ua lē gata o le toeaina taitai o le pulega a Saute, ae o le faafeagaiga o le ekalesia EFKS Southwest mai (Lufilufi ma Salesatele Falealili) ma le faletua ia Senerita mai Falefa ma Vini Fou.
Na matuai alo le Ekalesia EFKS Southwest Brisbane i le teu faatamalii e fai le faiva o faaaloalo e ala i le taumafataga tele auā malo valaaulia aemaise ai o se alalaga fiafia ma faamanū i le Atua.
