O le mae‘a ai o fesootaiga masani a le Penina o Asuisui i Brisbane ma le Radio Samoa i Aukilani Niu Sila i le afiafi o le Aso Sa, 26 o Ianuari, na faatino ai loa se Se‘i faapitoa o suafa e 103 o i latou uma sa faatauina le kalena a le Penina o Asuisui 2014.
E $25 tala le tau o le kalena, ma o loo iai uma le tele o ata o le community Samoa i Brisbane, o ni vaega na tutupu i le tausaga ua tuanai. O lea seleni e fesoasoani i le totogiina o taimi i luga o le ea.
Ae o le agaga faagaeetia e ala i le lagolago a le kamupani nonōtupe a le JD Financial sa mafai ona ofoina mai se manumalo o le pepa malaga fua mai Brisbane mo Samoa, le susuga ia Pepe ma Delilah John.
E momoli le faafetai i le atunuu ona o le agaga fia fesoasoani i soo se faamoemoe o lenei alaleo faatauvaa, ona o le fia tautua ia Samoa i Brisbane aemaise nisi o ana polokalame.
O le tasi agaga fia faafetai ona o faleoloa uma i tupu ma tamalii faapea faletua i la outou fesoasoani i le faamaopoopoina o seleni. Na molimauina lenei Se‘i e le susuga ia Aleni Taalolo o le Liaison Officer i le Oxley District Police ae o loo base lava i Inala.
Sa auai mai ai foi le Sponsor ma sa manino ma manuia mea uma lea sa pikiina ai le suafa o Maila Meleisea (Safune, Matautu & Poutasi Falealili), lea ua olioli ma faafetai ua ia mauaina le pepa malaga fua, ma ua sauni nei e folau atu i Samoa.
Faafetai lava le agalelei mo le faatauina o le tatou kalena. Ia faamanuia le Atua!