O se tulaga uigaese foi sa oo i ai le polokalame a le Elevate Youth Challenge o lenei tausaga i le toatele o tagata sa auai. Na vaevaeina i vaega e lua, o le Junior ma le Open Division.
O le junior sa manumalo ai le ausiva a le Kairos mai Redbank, tulaga lua le Snack Pacs mai Mansfield, ae o le siamupini o le Open Division o le Elevate Youth Challenge 2014 o le ausiva a le Body Rockers mai le Prince Academy, tulaga lua le Concrete Lions, ae tu tolu le Robin Hood Heroes.
Sa auai foi le susuga ia Alex Leapai ma ia ta‘utino ai i le suiga o lona olaga a o iai i totonu o le falepuipui o se lesona tāua lava lea mo tupulaga fai a‘e.
O le susuga a Bronson o le Misionare a le ekalesia sa laugaina le upu a le Atua, ma e toatele tupulaga sa ofoina o latou ola mo le Alii. O faamasino o le tauvaga o Mark Lee, Valerie Reekers ma Justin Crawford.
O le major sponsor o lenei polokalame o Yahweh Apparel ma le ekalesia o le River of Life ma aiga lotu o le Worship Centre i Logan City susuga ia Ps Anthony Mauinatu.
Na ta‘ape fiafia le tele o ausiva auā sa tofutofusia ma le faailoga tupe na maua i le po o le Aso Faraile na tea nei.
