Mae‘a aoaoga faiaoga Savaii fesootaiga tau computers

E toafā ni faiaoga i le motu tele i Salafai na tauaao i ai ni tusipasi e amanaia ai le mae‘a o a latou aoaoga i le polokalame mo faiaoga e ta‘ua o le EPICT.
O lenei tusipasi e faamaonia ai le faatautaia o aoaoga i tomai o fesootaiga i auala faatekonolosi ma faamatalaga televavave.
O se aoga na amata mai i Europa ae na faatautaia mo faiaoga Samoa e le EPICT a Ausetalia. E valu lelei pepa o lea aoga na amata mai i le tausaga e 2011 ae o lea ua faamae‘a i lenei tausaga. O le aotelega lava o le tomai i le faa computers le aoga lenei ae o loo faaopoopo i ai ma le tomai e mafai ai ona tufa atu le tomai o faiaoga i le faatinoga o a latou galuega faafaiaoga mo fanau.
E aoao ai ma auala e faataatitia ai suega a le fanau aemaise o isi polokalame auā lava fuafuaga o aoaoga a faiaoga nei.
E toatele faiaoga mai i aoga a le Malo atoa ai aoga a le Lotu ua aoaoina i lenei polokalame ma o i latou e toafā na tauaao atu e le afioga i le Minisita o Aoga a latou tusipasi e aofia ai Leausa Taala mai i le Kolisi o Palauli, o Sinivao Pisona o le Kolisi a Palauli i Sisifo, o Lisone Tonumaipe‘a mai i le Kolisi o Mataaevave ma Malae Falefou o le Kolisi a Amoa.
Faaalia e le Faauluuluga o le EPICT a Ausetalia, e maualuga taumafaiga a faiaoga Samoa i lenei polokalame faaleaoaoga ma na ia ta‘ua e maeaea le faatinoga o a latou galuega ma o soo se faamatalaga lava ma faamaumauga faatatau i le aoao atu i fanau o tomai nei tau fesootaiga televavave, e oo i auala o le a fua ai le tomai o fanau, na matuā manino ma o se isi vaega na molimauina o le tufa ma le faasoa a faiaoga nei o ia mataupu i fanau aoga i le malamalama o tamaiti aoga i nei tomai ua tufa atu.