O le faamati, o se tasi lenei o vaega tāua e faatino pea i tausaga taitasi e le ekalesia EFKS, o le āsia lea o maota o faafeagaiga ma faletua. Sa faagasolo mai lava i Samoa i aso ua mavae e oo foi i atunuu i fafo o loo faatāuaina ai lava ia vaega uma.
E ui lava ina maligi timuga ma loulouā le tau i Brisbane nei, peitai e lei taofia ai le faataunuuina o tiute ma faamoemoe e pei ona atofaina i le Aso Toonai na sei mavae atu nei, sa feagai ai ma le pulega a Matu.
Sa faataunuuina le aliitaeao poo le ‘ava o feiloaiga i le nofoaga e igoa o Strathpine. O le Susuga ia So‘iso‘i Nonu sa fai ma sui o le pulega e lauga faafeiloai, a o le susuga ia Puialii Kome Fidow sa lauga e fai ma sui o le aumalaga.
Na alo i le mālū taeao ona faagasolo lea o asiasiga masani i maota o faafeagaiga, lea sa feagai ai ma tina ma faletua uma o le pulega faapea le susuga i le tiakono toeaina ia Fiu Tu‘ipala Vaigafā, ma na molimauina le lava tapena o ia vaega uma e pei o sauniuniga uma auā auauana paia a le Atua, faletua ma aiga.
Na faaiuina i se taumafataga tele i le PCYC hall i Deception Bay, o le nofoaga lea o iai le Maota Samoa, ma taape ai le fuāmanusina. O susuga i faafeagaiga o le pulega a Matu e aofia ai le Toeaina ia Lau‘ie & Autalaga Lupematasila, le nofo a faafeagaiga, Rev Osa & Lealofi Nanai, Rev Tapenaga & Orita Reupena, Rev Aliota & Upulasi Tiatia, faapea Rev Sapu ma Sueileata Samoa.
