Mae‘a Trials mo le Tri-Nations 2010

Sa faatumulia se tasi o malae taalo i Aukilani Saute i le aoauli o le Aso Toonai na tea nei ona o le toatele o le mamalu o le atunuu sa latou maimoaina le sailia o ni au se lua a Niu Sila nei, aua le taamilosaga lea o le a talimalo ai tatou i Niu Sila nei e amata i le faaiuga o le vaiaso nei i le malae taalo a Waitemata i Aukilani Sisifo.
E lua ni au lea ua maea nei ona filifilia e talitali ai le aufili mai Samoa ma le au mai Ausetalia, faapea ai ma le au a tama i lalo o le 20 tausaga, Under 20, o au e lua a Niu Sila nei o NZ Samoa ma Aotearoa Samoa. Manatua foi o le lua ai lenei o tausaga talu ona faia lenei faamoemoe, ma o Niu Sila nei lea ua talimalo ai, a o Samoa lea na amata mea i le tausaga talu ai.
O le Taamilosaga lea e na o le atunuu talimalo e lua a latou au, ae taitasi uma au a isi atunuu.
O le tausaga talu ai lea na siamupini ai le isi au e tasi o au e lua a Samoa na malolo ai au a Niu Sila ma Ausetalia, a o trials la i le Aso Toonai lea na molimauina ai le lelei o alo ma tamafanau Samoa i Niu Sila nei, lea ua fili i ai au e lua mo le faamoemoe i le faaiuga o le vaiaso, e fa au o le taamilosaga ae e faaigoa lava o le Tafatolu ona e tolu atunuu o loo i ai au nei o le taamilosaga, faatasi ai ma le faapaleniina o le Draw o le faamoemoe.
O le Polokalame lava a le Iuni faatina a le Lakapi a Samoa lea ua faataunuuina ai lenei faamoemoe, e pei foi ona sa faailoa atu i tusitusiga muamua, aua lava le filifiliina o se Manu Samoa malosi ma lelei, a o alo atu tapenaga mo le Ipu a le Lalolagi 2011 i Niu Sila nei.
E matua lagolagoina malosi lenei faamoemoe e le gata i le toatele o Samoa i Aotearoa nei, a o le lagolago malosi a nisi o alo Samoa iloga i le taaloga e pei o le susuga Papaliitele Peter Fatialofa, Mark Birtwistle, Tu Nuualiitia ma Tanner Vili, o loo avea ma taiulu o au a NZ Samoa ma Aotearoa Samoa.