Ua taoto nei i le fale lomitusi i Saina, le isi galuega tele a le afioga ia Tofaeono Tanuvasa Tavale. O le tusi ua faaigoaina “O nisi o talitonuga i le mafuaaga na maua ai Samoa”.
O lenei galuega tele, na faamaonia mai e Tanuvasa i se feiloaiga ma le Samoa Times i le vaiaso talu ai. E fai si umi o tapenaina lenei galuega tele, ona talu ai e matuā tele ma anoanoai vaega sa tau tuufaatasia mo le faamoemoe ma le autū tonu o lenei tusitusiga.
Ua silia ma le tolu sefulu tausaga o faia pea lea galuega ma sa amataina i se suesuega faapitoa, ma le tau aoaoina o faamatalaga ma mau eseese sa manaomia, ona faato‘ā tuufaatasia ai lea ma faamae‘a ai le tele o isi vaega o le tusi.
O suesuega sa faia, e aofia ai ma le fesiligia o le toatele o tamalii o Samoa, o le au faitofa, ma toe ulutaia o le atunuu, i Upolu, Savaii ma Tutuila, faapea ma Niu Sila, i le faamoemoe lava e pei ona agai i ai le galuega.
E lē gata i le au faitofa o loo gase i ai ma moe ai talitonuga anamaua, ma le faavaeina mai o Samoa e ala i lē sa tuu gutu, ma tuu taliga i ai e mātua ua tofafa i tia tala o le vavau, ae faapea foi susuga i toeaiina ma taitai o Faifeau o Ekalesia taitasi, ona o le mau ma le talitonuga faa-Kerisiano.
E pei ona silafia le agaga ma le finagalo sa mafua ai le lagaina o le galuega ma le tusi lenei, o le ala ma le mafuaaga moni foi lea sa tapa ai ma saili malie ma tele se taimi sa faaaluina mo le faamoemoe.
Na ia saunoa foi ma faamatalaina lona naunau tele, aemaise ai o lona taumafai malosi pea ina ia faataunuu le galuega lea, ona o se tasi o ana moemitiga ua leva ona faataoto mai, a o galue i le galuega faafaiaoga i Samoa ma Niu Sila. Sa tusia isi tusi ma faamae‘aina, a o le taimi foi lea sa amata faufau ai ma tapenapena mālie le galuega ma le tusi e pei ona faamae‘aina nei. O lona lava talitonuga ma le atamai sa a‘oa‘oina ai, sa faavae ai lona manaoga mo le tusiaina o lea tusi, e tuufaatasia ai le talitonuga ma mau a Samoa, faapea ai le taunuu atu o le Talalelei ma le mau a le Tusi Paia mo Samoa lava latou ia.
Sa ia ta‘ua foi, e lē o iai sona lagona ma sona finagalo na te faamausali ai, ma taofi o le mea moni lea ua lomia ma faamauina i le tusi, peitai o le manaoga autū lava ma le faamoemoe, o le iai ma le faamauina o ia talitonuga ma faamatalaga e saga faamausaliina ai i loto ma finagalo o le toatele o tagata Samoa, aemaise lava o fanau ma tupulaga fai a‘e o le atunuu.
E tatau lava ona iai ni faamatalaga ma ni faamaumauga e faamaonia ai, ma totoina ai pea i loto ma agaga o tagata le fofoaina o Samoa, e faavae i mau ma talitonuga o le vavau, aemaise o le fesoasoani mai ma tusitusiga a le Tusi Paia.
O le tusi ua tuuina atu mo le galuega mulimuli i lona lomiaina, ua atoa i ai le luasefulu o tusi sa tuufaatasia ma tusia e le afioga ia Tofaeono Tanuvasa Tavale. E sefulu ma le iva isi tusi sa tusia ma o loo iai pea i luga o le maketi ma avanoa mo soo se tasi lava e manao i ai, ma o ia tusi o loo matuā molimauina e le toatele o tagata le tāua ma le aoga tele mo le gagana Samoa, ma lona faaaogāina i le taimi o aganuu ma aga i fanua.
E aofia i le aofaiga e luasefulu e pei ona faamaonia mai, nisi o tusi e lua sa tusia a o iai i le Iunivesite i Aukilani, ma o loo avea pea ma meatotino a le Iunivesite ma nofo ai pea i le latou faletusi e oo mai i le taimi nei.
Ua faamoemoe o se taimi o le masina fou o le a toe foi mai ai le tusi i Niu Sila pe a mae‘a ona lolomiina, ona sauni ai loa lea mo le faalauiloaina faalauaitele ma avanoa ai mo le faatauina atu. E tusa ma le 46,000 tala Niu Sila le tau o loo lomia ai le tusi, ae lei maua e le Samoa Times, se tau sa faaaluina mo isi vaega sa tapenaina ai le galuega.
O le taimi sa tuufaatasia ai e pei ona ta‘ua muamua, ua silia ma le tolusefulu tausaga. O se galuega telē tele ma le taugata pe afai ae tuu i ai ma le taimi sa faaaluina, faapea ma le faatupeina o femalagaiga ma suesuega faapitoa sa faia. Ae ui i lea e leai se isi fiafiaga sili i lona finagalo, ina ua mae‘a ma faataunuuina le galuega sa fau ao fau po, ma sa faufauina foi mo se taimi umi.
O lona finagalo, ia faaauau pea ona faia galuega uma e aogā mo le atunuu, aemise foi o galuega mo le finagalo o le Atua, a o maua pea le malosi.
O lana lea auaunaga ma lana tautua ia Samoa ma ona tagata. Ua i le va o le 75 ma le 80 tausaga o le soifua, ae na ia faaalia, o le tasi lea o auala o loo ia maua ai le malosi, o le faagaioi lea o lona mafaufau i le galuega faatusitala, ma le tusitusi.
