Sa na o ni mafaufauga, faalepō poo se moemitiga i le fia fausiaina lea o se fale poo se Hall e tua i ai lenei matagaluega i Salani, ona o se matagaluega e toagaogao tele. Ae o le Atua e leai se lē mafai o i lana afio, pe afai tatou te galulue faatuatua ma le faamaoni mo ia ma lona finagalo.
Na a‘e ai se tofā i tamā, tina, alo ma fanau a lenei matagaluega i totonu o Aukilani, o le a amataina se mafutaga ina ia saili se seleni ma faataunuu ai loa lenei faalepō.
O se mafutaga e toagaogao, ae o le fetalaiga a lo tatou Atua, o se mea e potopoto ai le toalua poo le toatolu ona o lona suafa, e faataunuuina lava i le manuia.
E silia i le selau ma ona tupu afe le tupe na fausia ai lenei fale poo le Hall. E 61 afe tala na tuuina atu i Samoa e le mafutaga, ona teu ai lea mo sina vaitaimi ina ia maua ai sina tului.
Sa toe faaopoopo atu i ai le 20 afe tala faatasi ai ma le galulue malosi a le faafeagaiga, ma nai matafale toagaogao, na maua ai loa lea o le tupe na fausia ai lenei galuega. E tusa na o le tasi lava le masina, poo le fa vaiaso, na fausia ai lenei Hall ae mae‘a.
Faafetai, Faafetai tele lava!
Na faaleo le agaga faafetai o le mafautaga a alo ma fanau o le Ekalesia Metotisi a Salani Falealili i Aukilani i Niu Sila ia i latou uma lava sa lagolagosua ma galulue faatasi i le faataunuuina o lenei faamoemoe sa moemiti i ai le ekalesia.
“Mai i le ta‘ele o o matou agaga matou te momoli atu ai la matou faafetai tele i o matou aiga, uō ma ē masani, paolo, ma gafa e malu ai le susuga i le tausi matagaluega, susuga ia Rev. Iosia Faleupolu Tiatia ma le faletua ia Ruta. Faapea Tamalii ma Failauga, Faletua ma Tausi, le malosi o le matagaluega seia oo lava i alo ma fanau a le Ekalesia Metotisi i Salani Falealili. Aemaise foi la outou lagolago malosi, nai o matou uso i le Ekalesia EFKS i si o matou nuu i Salani.
Silasila ane i le ata lena o le Hall sa tatou galulue faatasi ai. O lou afu na maligi ona o lau taulaga mo le Atua ma lona finagalo, le Atua o manuia, ia saga faatutumu atu, ia aua ne‘i atutasi ae ia sautualasi.
Ia pa‘ū foi lou afu i le eleele lelei ia ola talaulau manuia ai oe o lou aiga ma si au fanau seia oo i le faavavau.”
Faamatalaga na tuuina mai
