Ma'a Nonu

Ma’a Nonu

O loo iai le faitau e toe filifilia Maa Nonu mo le ‘au a le All Blacks mo le Ipu o le Lalolagi i Iapani i le masina o Setema.

O le auai o Nonu i le Super Rugby i Niu Sila o le faasino ala lea i le manao o le tama taaalo e toe ofu e ia le ofu numera 12 mo le All Blacks e pei o le 2011, ma le 2015.

O le taalo ai o Nonu i le ‘au a le Auckland Blues o le a amatalia ai lana galuega o le toe sao ai lea i totonu o le ‘au a le All Blacks. E le na’o le manao a le tagata taalo e taulia, e manino le naunautaga o Nonu e toe ofi i totonu o le ‘au. Ae o le isi fua o le tumau ai pea lea o le agavaa ma le lelei o le taleni – a Nonu – pe fetaui mo le maualuga o le taaloga e taalo ai mo le All Blacks. O lea tulaga e lē o manino lea i le taimi nei.

O le a vaaia le ituaiga tulaga o loo iai Nonu ma lana taalo i se taimi vave i le amatalia o le Super Rugby i le masina fou. O le taaloga amata a le Blues i le Super Rugby e feagai ai ma le ‘au a le Crusaders i le aso 15 o Fepuari i Eden Park. E matautia lea taaloga mo Nonu ma lona faamoemoe, aua o le a feagai ai ma tagata tumau a le All Blacks i le taimi nei e iai Ryan Crotty ma Jack Goodhue. A faapea e saotia Sonny Bill Williams mai ona manu’aga ae e taalo i le taaloga lea o le a avea ai lea ma faata’ita’iga muamua a Nonu mo le All Blacks.

Peitai, e ao ona faatalitali le komiti seia faaopoopo taaloga a Nonu i le Super Rugby e faaputu ai lona agavaa ma toe faafoi ai le vaai ma le tamoe i ‘au a Niu Sila. O le fesoasoani tele mo Nonu ma lana taumafai o le a gafa lea ma Tana Umaga. O Umaga o le a vaaia le Backline a le Blues, e masani lelei foi o ia ma le taalo a Nonu na la taalo faatasi mo Ueligitone ma le All Blacks.

I ripoti mai le faiaoga fou, Leon MacDonald e maua ai le toe amatalia o le taumafai a Maa Nonu i le Super Rugby. Fai mai le faiaoga o le tulaga lelei tele mo Nonu o le toe foi mai lea ma le naunau e toe a’oga i le tulaga o loo iai le lakapi i le taimi nei. Fai mai le faiaoga ua pei lava Nonu o se tama fou i le taaloga.

E lē o pei o ia o se tagata tuai e tu ese mai le ‘au atoa. Ae o loo tuufesili i tulaga uma o le taaloga, aemaise ai le galue faatasi o ia ma isi tama o le Blues. O se tulaga lelei lea e faafaigofie ai galuega a le Vasega o Faia’oga ma le ‘au atoa.

Afai ae toe ofi Nonu i le All Blacks o le a avea ai o ia ma aseta taua a le All Blacks. O le a atoa ai i Iapani le fa o Ipu o le Lalolagi o le a taalo ai, 2007, 2011, 2015 ma le 2019. O le 2015 na vaaia ai le matautia o lana taalo aemaise ai le taaloga faaiu ma Ausetalia i Twickenham na manumalo ai le All Blacks. O le mae’a ai o le RWC lea na faamavae ai loa ma Maa Nonu mai le ‘au e taalo i Farani mo le kalapu a Toulon.