“E lē o se mafutaga faaulugalii ae o le mafutaga faaleagaga”…Toluono Feti
Ua folasia nei i luma o le faamasinoga le molimau tetee a le tofa Toluono Feti faasaga i moliaga e lua a leoleo o lona faia o ni gaioiga solitulafono e fesootai ma lona faatauina o ni fanua se lua.
O le isi fanua sa i le suafa o Theresa Taufau Stowers, a o le isi sa i le suafa o Rosita Bourke nee Stowers.
Ua na o Toluono le molimau sa fofogaina a le itu tetee, ma o vaega uma sa ta‘ua e le molimau autū a leoleo le tina o Vaselisa Stowers o loo tuli lona faasalaga i le falepuipui ona o le mataupu lava lea i le faatauina i se auala faaalatua o fanua, sa matuā teena malosi e Toluono.
Sa ia teena foi ni vaega o le molimau a lana loia le afioga Tuimalealiifano Vaaleto‘a, lea sa molimau foi e lagolago moliaga a leoleo faasaga i le tofa Toluono Feti. “Sa iai le lua mafutaga faaulugalii ma Vaselisa, e sa‘o?” O le fesili tuliloa lea a le loia a le itu a leoleo, ina ua mae‘a ona fesiligia Toluono e lana loia o Toleafoa Solomona Toailoa.
Na tali Toluono sa iai le la mafutaga, ae e lē o se mafutaga e faapea na faia ai se fesootaiga faaulugalii, ae o se mafutaga faaleuo.
“E lē o se mafutaga faaulugalii ae o le mafutaga faaleagaga (spiritual relationship)”. O le tali ane lea a lē o loo molia.
Sa tuliloaina pea e le loia o Precious Chang le molimau, poo le la mafutaga lea sa faifai soo, ma sa mafuta i ni taumafataga o le afiafi, ma mafuta foi pe a agai e taumafa se vai malu. Na ioe Toluono sa iai a la mafutaga faapea, ae e lē fai sooa ae pe faatasi pe faalua foi i le masina ona feiloai ma Vaselisa.
O le molimau a lea tina i le faamasinoga o Toluono sa ia faailoa ai i le faamasinoga sa iai le la mafutaga faaulugalii ma lē o loo molia, ina ua amata ona faatino le gaioiga na faatau ai e Toluono le fanua e tasi le eka o Theresa Taufau Stowers.
Sa faaalia foi e Vaselisa ina ua alu i Niu Sila, na malaga atu Toluono ma la mafuta faatasi ai i se faletalimalo, ma sa malaga faatasi mai foi ina ua taliu mai i Samoa, lea na nofo ai Toluono i Fiti ae malaga mai lava ia i Samoa.
Sa teena e Toluono le iai o se mafutaga ma lea tina i se faletalimalo. Na tuusa‘o foi le fesili a le loia a leoleo i lē o loo molia pe moni o le la feiloaiga muamua ma Vaselisa i le fale kalapu o le Seana, sa fai i ai o ia e lei faaipoipo. Sa ioe Toluono o lana tala lea na fai, ae sa ia faaalia ile faamasinoga o tala o inuga pia (beer talk).
I lana molimau na ta‘ua ai e lē o loo molia, o le faatauga o le fanua o Theresa, o Vaselisa lava na taulamua i le tauanau atu o ia e faatau, ona o ia (Vaselisa) e ana le fanua.
Sa ioe Toluono o ia na taulamua i le sailia o faamaumauga o le fanua i le ofisa o loo lesitala ai fanua ile Matagaluega o Puanaoa Faalenatura ma le Siosiomaga.
Sa ia ioe foi, o ia na fai ia Vaselisa la te o i le ofisa o lana loia o Tuimalealiifano e faia ai pepa ma liliu atu le fanua ia te ia ina ua mae‘a ona faatau.
O le tau o le tasi le eka na muamua faatino e $180,000 ma na ta‘ua e Toluono na mae‘a ona ia totogiina uma lea seleni o le tau o le fanua i le tina o Vaselisa, poo Lisa e pei ona iloa ai
E faapea foi le tulaga na oo i le faatauga o le fanua o Rosita Bourke, ae na faaalia e Toluono o le faatauga lona lua lea, o Vaselisa lava na ia faailoa atu o le isi lea ona igoa o Rosita Bourke, ma sa ia talitonuina ma le atoatoa lea faamatalaga, ma o le mafuaaga foi lea na la sailia ai pepa i le ofisa e leistala ai fanua, ma agai foi i le ofisa o le loia o Tuimalealiifanu ma faatino le sainiga o le aveesea o le fanua.
O le fanua e kuata eka o Rosita Bourke, na faatau e Toluono, ae sa ia toe faatau atu i se tasi o lona aiga.
E $45,000 na faatau ai e Toluono le fanua. Sa teena e lē o loo molia se vaega o le molimau a Tuimalealiifano sa ta‘ua ai, sa fai atu (Toluono) e fai i le faamasinoga sa avatu uma tupe o le faatauga o le fanua ia te ia (loia).
O le faamatalaga lea a Tuimalealiifano i lana molimau i le Faamasinoga Muamua i le tausaga e 2010 sa suesueina ai le faatauina o fanua.
Peitai na faaalia e Toluono, o le sa‘o o lana tala na fai i le loia, ia faailoa i le faamasinoga o lisiti uma o vaegatupe sa ia ave ia Vaselisa o le tau o le fanua sa avatu ia te ia (loia o Tuimalealiifano).
Ua mae‘a nei ona tuuina atu le molimau a lē o loo molia, ma o Mati o le tausaga nei o le a toe fofogaina ai mo se faaiuga a le faamasinoga.
