O le tina o Gaumata‘u e silafia i le ta‘uga faapuupuu o lona suafa oTa‘u Retzlaff Hunkin ua silafia e le toatele i lona faleaiga o loo faaigoaina o Amani i Fugalei.
Ae e sili ona silafia e le toatele i taimi o galue i le ofisa malaga o le Retzlaff Travel and Tours i tausaga ua mavae.
O ia lea ua manumalo i le se‘i a le kamupani telefoni feaveai o le Bluesky, ua na maua ai pepa malaga fua e lima ma le faailogatupe e luasefulu afe e faaaogā i lana tafaoga i soo se atunuu lava e fia malaga i ai ma nisi se toalima o lona aiga.
Ua ia faaalia o le a malaga i Farani e faaaogā i ai lona manumalo ma e leai lava se isi o le a la malaga faatasi ua na o lana tautoga e toatasi poo lana manamea o Henry Tuiletufuga Hunkin ma lana fanau. Peitai e toafitu ona alo, ma o le a faaaogā se vaega o le luasefulu afe e totogi ai pasese o le isi toalua ona atoa lea o le latou tafaoga.
O le tina foi o Ta‘u na manumalo i se tasi o taavale o lulu ta‘i sefulu tala i le pepa a le kamupani faatau taavale o le Singapore Motors lea sa i Vaitele.
O le faalua ai lea ona laki lenei tina o le atunuu, ma o se mitamita lea i le tamā o Henry ma si ona toalua. O si a la pisinisi le faleaiga o Amani i Fugalei e lauiloa i lana keke puaa aemaise o taumafa o loo latou saunia mo le atunuu lautele.
O se tina e talitonu i faamanuiaga a le Atua mo ia ma lona aiga auā e to‘aga i le lotu ma ola i se olaga kerisiano e pei ona vaaia i faatasiga faaleagaga. Faaalia e Ta‘u o lona filifilia o Farani e malaga i ai ma lona aiga, ona o aso a o soifua si ona tina e talanoa atu pea i le matagofie o Europa ma vaaiga felanulanuai.
O ona tuaa o Tui ma Masi Retzlaff e lauiloa i le atunuu i pisinisi i le motu i Salafai e pei ona iai le latou auaunaga o se faleoloa, faleaiga ma le fale falaoa i le taulaga o Salelologa.
O le aoauli o le Aso Lulu, 5 o Fepuari 2013 i luma maota o le Malo i le eleele fou na faia ai le se‘i a le Bluesky Samoa mai lana faalauiloa sa faagasolo mai i le masina o Oketopa o le tausaga ua mavae ma le faamoemoe e faia le se‘i e iloa ai le tagata manumalo ma isi faailoga faaopoopo a o lumanai le Kerisimasi o le tausaga na tea nei.
Peitai ona o le afā o Eveni ma mafatiaga sa feagai ma le atunuu, o le mafuaaga lea o le lē faataunuuina ae tolopo mai i le amataga o le tausaga nei.
O le tina o Mereane Savaiinaea Amituanai Sevesi, mai Salailua i Savaii, o se tasi e fai foi lana pisinisi faleoloa ma faleaiga mo meaai a le fanau a‘oga, na ia maua le faailoga lua o le tinoitupe e $4,000 tala.