Ua molimauina le tumutumu o faleoloa tetele o loo maua ai oloa faufale i faatauga mo le toe fausia o fale ua faaletonu ona o sauaga a tafega ma lologa faapea le afā o Eveni.
O le molimau lava ia e toaitiiti lava tagata faatau mo le fausia o fale sa amata fau mai i lena tausaga ua mavae, ae o le toatele lava o tagata mai aiga ua matuā leai ni fale i tafega ma lologa faapea aiga ua salalautasi fale pe sueni foi ni vaega i le malosi o le afā.
O le tasi o itu o loo molimauina o le oso faafuasei i luga o le tau o oloa nei e pei o apa atofale, laupapa ma sima faapea fao, ae lē taulia isi oloa e faaaogā i galuega faapea.
Faaalia e se tasi o faipisinisi o loo alumia tele ana oloa faufale i le taimi nei, o loo fai fuafua ana tau i aiga ua leaga fale ae o loo talosaga atu mo ni tau pau poo discounts ona o le utiuti o nai seleni o loo faatupe ai si a latou galuega.
O le molimau a nisi tagata faigaluega e galulue i kamupani tetele o loo maua ai foi ia oloa, e fai lava si saoasaoa o le taulia o oloa faufale i le taimi nei.
O lona uiga o le itu mautinoa ua luluu le aufaipisinisi e maua ai ia oloa. Ua tatou iloa ma malamalama i uiga faapenei e tulai mai i si o tatou atunuu, auā e pei ona silafia e pei e avea faaletonu i ni mala faalenatura e aafia ai meatotino a tagata ma avanoa e tafili saunoa ai i tau o a latou oloa.
Manatua foi taimi e sioki ai se oloa, o le tasi lea taimi e faafuasei ai ona oso i luga tau o se oloa ua faaitiitia ona ua tuai mai vaa lauoloa, ae o nisi oloa e pei o le suka e manaomia tele, e tumau le tau pe a faaitiitia ae ua pau le fua poo se isi faaupuga ua laitiiti le pepa suka e tasi le pauna, ua lē toe maua le lapoa sa iai a o tele.
