E to‘a sefululima paaga a le kamupani lafo tupe o le Pacific Ezy Money i Samoa ma Niu Sila ua tauaaoina faailogatupe ta‘i $200 tala i se faalauiloa a lea kamupani na faia mo le masina o Me 2011.
O lea faalauiloa sa autū i le tagata e tele ana tupe e lafo mai i Niu Sila i le Pacific Ezy Money Transfer ona maua lea o lona faailoga.
E lē gata ina manuia ai le tagata i Samoa o loo lafo mai i ai le seleni, ae faapea foi ona ave le meaalofa tupe a le kamupani i lē na lafoina mai le seleni i Niu Sila e faaaogā ai lava le auaunaga a le kamupani.
Faaalia e le alii Pule o Faimalo Allan Stowers, o le naunautaiga o le Pacific Ezy Money, ia lē gata ina faaaogā le latou auaunaga e tagata i Niu Sila e lafo mai ai seleni i mātua, o fanau ma aiga i Samoa, ae ia tatau foi i le kamupani ona faatāua ma manatua le lagolago atu a le atunuu ia latou taumafaiga faapisinisi.
O le mafuaaga foi lea o le faia o faalauiloa ma manumalo ai le toatele i faailoga tupe. I Samoa e to‘a sefulu na faamanuiaina i le se‘i o le masina o Me ae toalima na manumalo i Niu Sila. Ua lē maua suafa o i latou ona o se faaletonu lē ma‘alofia e mafua i le leiloloa o pepa o faamaumauga o loo iai suafa.
O le masina o Aperila na manumalo ai se tamā matua i le se‘i faapitoa o le lala fou a le Pacific Ezy i Vaitele-tai o loo i le nofoaga o iai le maketi fou. Faaalia e le alii pule o le a faasolosolo pea ona faia a latou faalauiloa e maua ai faailogatupe.
O loo loma nei le isi taumafaiga a le kamupani, o le se‘i o sana lulu o loo sailia ai seleni auā le foaiina atu faameaalofa mo nisi o faalapotopotoga tuma‘oti e pei o le Toomaga mo Tagata Puapuagatia, le nofoaga o tamaitai Sa Monike i Vailima, atoa ai ma se ekalesia i Magele i Aukilani i Saute o loo feagai ma le tapenaina o pesepesega o le 13 aso o le Kerisimasi i Aukilani Niu Sila i tausaga taitasi.
E lē o se taimi muamua lenei ua faia ai ni foai faasamaria agalelei a le kamupani. O le aso 17 o Iuni 2011 o le a se‘iina ai le lulu saili tupe i le faletalimalo o le Moanalisa i Vaitele-tai sosoo ma le nofoaga ua iai le lala o le falemai tuma‘oti o le Medcen i lona nofoaga autū o loo i Vailima.
