Lulu’u $16,000, Samoa Life Assurance

O le aso 12 o Setema 2007 na amata toesea ai tupe o inisiua a tagata o loo totogi atu i le Faalapotopotoga o Inisiua o soifua a le Malo o Samoa le Samoa Life Assurance Corporation. E $5,118.70sene se vaegatupe na gaoia muamua, ae tasi le vaiaso na va a’i ae toe gaoia le isi $5,702.50sene i le aso 19 o Setema lava 2007. O le gaoiga mulimuli o le aso 28 o le masina lava lea na to’esea ai le isi $5,195.70sene. O le aofa’iga uma o nei seleni o inisiua a tagata na gaoia ma to’esea e $16,013.90sene. O le mafua’aga lea o le molia o le alii o Laifa Vaoiva o Sapo’e ma Vaiala 23 tausaga le matua i moliaga e tolu o le gaoi a’o avea ma tagata faigaluega (theft as a servant).
O fa’amaumauga a leoleo na tuuina atu i le fa’amasinoga na faaalia ai o le ua molia sa galue o se tagata e talia tupe poo le kesia (cashier). O lana galuega o le talia o tupe o inisiua a tagata ona faalisiti lea ma ave e teu. Na te faamaumauina lelei tupe totogi o inisiua, ma a ma’ea aso taitasi ona ia faapaleni lea o tupe mo le tuuina atu i le faletupe, pe a ma’ea ona ia ave ile tausi tupe sinia a le ofisa poo le senior accountant mo le toe siakiina ma faamaonia le aofaiga o seleni o le a ave e teu. I totonu o ona tiute nei na molimauina ai loa le tulai mai o se faaletonu i le to’esea o nisi seleni e pei ona faaalia atu i le vaega amata o lenei lipoti mai le faamasinoga maualuga i Apia.
O le faamatalaga na tuuina atu e Laifa i le ofisa fa’anofo va’ava’aia e fa’apea, na mafua ona ia faia le solitulafono ona ua tete’ea ma lana uo teine, ma o tupe na ia gaoia sa faaalu e tafafao ai ma ana uo i fale kalapu, sei tau faagalogalo ai tiga ma le mafatia i le la mafutaga ma lana uo. Na ia faia foi le gaioiga ona ua leai sana tupe. O se tusi mai le faife’au o lana ekalesia na ta’ua ai ni tulaga lelei i le amio a le ua molia ma o se tagata e to’aga ile lotu ma famaopoopo i soo se galuega fai a le aulotu. O ia foi o se tagata faato’a molia ise solitulafono.
Peitai na faaalia e le faamasino sili i lana fa’ai’uga tusitusia, le matuaia ma le ogaoga o le solitulafono na faia e Laifa ona o le faatuatuaga na ave iai e le faalapotopotoga o inisiua a le Malo, ua ia talepe. O se itu lea e silasila pea iai le faamasinoga pe a faia ana faaiuga i ituaiga o solitulafono fa’apea. E 2 tausaga le faasalaga faafalepuipui na amata ai se iloiloga o le faasalaga, peitai na to’esea le 4 masina ona o le faatoa molia lea o le alii o Laifa Vaoiva, aemaise o lona ioeina o moliaga e tolu. Ua totoe ai le tausaga e tasi ma masina e 8 ua faasalaina ai o ia e nofosala i le falepuipui i Tafa’igata.