“Pacific: Making our place in education”
O se faalepo o loo tulituliloa pea i suesuega ma sailiiliga a se tasi o tamalii Samoa, o le suafa foi ua iloga i totonu o faalagamaea o a‘oa‘oga faaiunivesite i Niu Sila nei ma le Pasefika, le Afioga Tagaloatele Professor Peggy Fairbairn-Dunlop, o loo finau ai pea ina ia faamautinoa o loo faaauau ona siisii i luga le faatulagaina o ausiaga e mafai ona laasia e taumafaiga a tamafanau a le Pasefika i totonu o nei a‘oa‘oga faaiunivesite.
O le vaega lena sa agai tele i ai lana talanoa a o faia lana saunoaga i le lautele o se polofesa i aoaoga faavae mo suesuega faa-Pasefika i le nofoaga o le AUT i Manukau. Saunoa Tagaloatele, e ui lava o loo matauina le uumi o taimi o loo a‘oa‘oina ai fanau a le Pasefika i totonu o nei a‘oa‘oga, ae e tele lava ina maulalo ifo o latou togi poo agavaa o loo mafai ona ausia, nai lo le tulaga sili e tatau ona ausia e fanau i ia ituaiga o a‘oa‘oga.
O le luitau lea na faatu atu e le tamaitai polofesa a o faia lana saunoaga, ua tatau ona tilotilo i latou o loo i pulega a iunivesite i le atunuu i se auala e ono toe fetuuai ai ma faatulaga a latou polokalame ina ia faigofie ona faaofi i totonu fanau a le Pasefika, mo le sologa lelei o a latou suesuega ma a‘oa‘oga i totonu o nei iunivesite.
Saunoa Tagaloatele, ua lē o toe natia le maualuga ua oo i ai tomai o fanau a le Pasefika i totonu o lenei atunuu i taleni eseese e pei o taaloga, faafiafiaga, musika ma isi taleni maoa‘e.
Peitai o loo iai lava sina eseesega laititi mai le maualuga o loo oo i ai a latou taumafai i le tulaga o a‘oa‘oga pe a fua i se aofaiga toatele.
O lana faamalosi foi lea mo fanau uma a le Pasefika sa auai i lea aso, ina ia ala mai ma faamausalī se tulaga o le Pasefika i totonu o nei atunuu i faalagamaea o a‘oa‘oga faaiunivesite.
Sa auai atu i lea aso nisi o suafa iloga o le Pasefika i Niu Sila nei, e pei o le afioga i le alii faipule o Magele, Tofa Su‘a William Sio, lea foi sa momoli lana upu faafetai i le tamaitai polofesa mo lona sao tele i le Pasefika e tauala mai ana suesuega. Sa iai foi le alii pese opera o Ben Makisi, ma isi uma o loo galulue pe aooga foi i le AUT.
O le Afioga Tagaloatele Professor Fairbairn-Dunlop o ia o le polofesa a le AUT University i suesuega o mataupu tau le Pasefika, ma o ia foi na uluai umia lea tulaga i totonu o Niu Sila. Ua tele tausaga o loo faia pea ana sailiiliga ma tusitusiga i mataupu tau atina‘e a le Pasefika, mai lava le siomaga i totonu o aiga seia oo i le tulaga aoaotetele o tagata Pasefika.
Sa faafetaia e i latou uma na iai i lea aso le sao o le Afioga Tagaloatele i totonu o lenei atunuu auā le unaia o ni tulaga maualuluga mo tagata Pasefika i a‘oa‘oga, ma na faaiu lana lauga, i sana sausaunoaga e pei lava ona masani ai taimi faapea i aganuu faa-Pasefika, a o aiaiuli le mamalu o le aofia ma lona aiga.
