Lu‘i e Warren Fuiava le siamupini o Niu Sila

O loo tālia le tali mai o le siamupini o Niu Sila o Soulan Pounceby i le lu‘i a Warren Fuiava mo le fusi o le World Boxing Organisation (WBO) Asia-Pacific o le aupaga ‘light heavyweight’ o loo umia e Pounceby.

O le Aso Faraile, 18 Novema sa fuafua e fetaui ai Pounceby ma le alii Ausetalia o Marc Bagero i Aukilani. Peitai o le faamaamulu ai o le alii Ausetalia e pei ona faamaonia mai e le ‘promoter’ o lea fusuaga ia Bruce Glozier, ua faaulu ai nei le lui a Fuiava le siamupini o Samoa.

O Pounceby ua tolu tausaga o siamupini i le atu Asia ma le Pasefika ma o loo tulaga lima i le lalolagi i fusuaga a le WBO i le aupaga ‘light heavyweight’.

Faaalia e Pa‘u Fereti Puni o le pulega a le Event Polynesia, “O le fusuaga lenei ua leva ona fia maimoa i ai le toatele i Niu Sila aemaise foi o tatou tagata Samoa ona e lei malo lava se Samoa ia Pounceby.”

E faalua ona fetaui ma faatoilalo e Pounceby alii Samoa ia Togasilimai Letoa, Niusila Seiuli, Fale Siaoloa faapea foi Ioane Talamago. E faatasi ona fetaui ma manumalo Pounceby i alii Samoa ia Bob Gasio, Faimasasa Tavui, Wilhem Schwalger, Supi Moimoi faapea Mose Ioelu.

Ua toe foi nei Fuiava i Samoa e sauni mai ai, faapea foi Vaitele Soi o loo fuafua e fusu ai foi i lea fusuaga.

O Warren ma Soi sa taaalo uma i Aukilani i le po o le Aso Faraile i le fusuaga a le Vili’s Gym Boxing Promotion, lea na manumalo uma a laua fusuaga i le tu‘ioti i le taamilosaga muamua. O le paga faapitoa o lea afiafi o Faimasasa Tavui lea foi o loo i lalo o le pulega a Event Polynesia, na manumalo i le alii Pakistan o Kasheed Mumtaz i le tu‘ioti i le taamilosaga muamua.

O le vaiaso na tuanai na faia ai le faatautu‘i i le ‘mouthguard’ ma seevae lakapi o Alesana Tuilagi le uigi saoasaoa a le Manu Samoa mo le tau sailia o pasese o le aufusu lenei mai Samoa.

E lei faamanuiaina le faatautu‘i ma sa toe faaauau seia oo mai i le aso ananafi, Aso Gafua i luga o le TradeMe.

O loo faafetaia e Pa‘u le pulega a le Pacific Ezy Money Transfer, le fale lafo tupe i Samoa faapea le faletaavale o le Enterprise Motor Group i Manukau mo le fesoasoani na mafai ai ona malaga mai Fuiava ma Soi i le fusuaga i le Aso Faraile faapea lo la faiaoga ia Leapai Richard Brown.

Faaalia foi e Pa‘u, “Ua maua mai le fesootaiga mai le pulega a le Kamupani o le OPRO ma faailoa mai ai le latou fesoasoani tupe e $5,000 pauni faatasi ma le tuuina mai o ‘mouthguards’ mo tama fusu Samoa uma o loo i lalo o le polokalame.

O lenei fesoasoani o loo tauala mai i le pulega a Alesana ma Manusamoa Tuilagi, le tofa ia Lauaki Fereti Tuilagi i Egelani.”