O se tasi lenei o taaloga a Sonny Bill Williams ua tele ina fefaasoaa‘i ai le toatele ina ia filifili lelei i se taaloga e tasi na te tauaveina nai lo o le naunau i taaloga e tele. E le toe fesiligia le tomai o lenei alii e le gata i le taaloga o le lakapi Iuni faatasi ai ma le Lakapi Liki ae faapea foi le taaloga tau faipelega.
A o faasauni atu lenei alii mo lana fusuaga ma Francois Botha i le vaiaso nei, na ia tautino ai e faapea, afai ae lē manuia lana taumafaiga i lenei fusuaga, ua sili ai ia te ia ona fulitua loa i le taaloga o faipelega poo fusuaga, ina ua mae‘a fusuaga faapolofesa e lima a lenei alii ae ua vaaia ai le agaigai atu pea i luga o le tausinio o lenei alii i lea taaloga o faipelega.
O le faaiuga la o le vaiaso nei o lea ua faamoemoe o le a faataunuuina ai le fusuaga tāua tele lenei i Brisbane i Ausetalia.
E tusa ai ma ni faamatalaga tusitusia i le alii lenei o Francois Botha e faapea, ua silia ma le 60 fusuaga faapolofesa a lenei alii mai Aferika i Saute, pe a faatusatusa ia Sonny Bill Williams e na o le 5 fusuaga faapolofesa i le paga mamafa.
O le alii foi lenei ia Francois Botha ua mae‘a ona fusu i le maea ma nisi iloga i lea taaloga i le paga mamafa e pei o Mike Tyson, Lennox Lewis ma Evander Holyfield. O se fusuaga e lē faigofie pe a faatusatusa i le tomai o le alii o Francois Botha, aemaise foi le tulaga maualuga o loo iai nei le alii ia Sonny Bill Williams i ana fusuaga faapolofesa i le paga mamafa. O le manumalo ai o Sonny Bill Williams i le Fusi lenei o le “WBA International Belt” pe afai e faamanuiaina ai, e mautinoa o le a siisii maualuga atu ai loa ma lona tulaga i le faatulagaga o tamafusu lelei i le paga lava lenei mamafa faapolofesa i le lumanai, aemaise ai o lea o le a maimoa ai le lalolagi i faasalalauga tuusa‘o o lea fusuaga i Ausetalia, Niu Sila faapea foi Aferika i Saute.
E ui lava i ia tapenaga uma, ae na faailoa faalauaitele e Sonny lona faatofa aloaia i le taaloga o fusuaga ma faipelega pe a lē manuia lana taumafaiga, ae toe taliu loa e faaauau lona iai i le taaloga o le lakapi liki mo Sydney Roosters i le masina fou. Na ta‘ua foi e Sonny e faapea, e tāua tele le iai o fusuaga tetele faapea e iloilo lelei ai le agai i luma i lea taaloga nai lo le maumau ai o le taimi aemaise e lē talavou pea le olaga.
E faleaoga mea uma e seiloga lava foi ua oo i ai faatoa iloa lelei le tāua ma le lumanai lelei o loo iai, ma ua sauniuni lelei le alii o Sonny Bill Williams e faafetoaia le alii Aferika i Saute i le la taaloga faapolofesa i le paga mamafa i le faaiuga o le vaiaso nei.
Talosia ia lē taumafai a lenei alo o Samoa ina ia manuia lona alo atu i lea foi faagatama i le faaiuga o le vaiaso.
O le aso lava foi lea i le fusuaga a Sonny Bill Williams o le a fusu ai foi le alii tautaua i le lakapi a Ausetalia i le Lakapi Iuni, ia Quade Cooper i lana fusuaga mo le uluai taimi i lea lava afiafi.
