“Lea tou te tulituli a‘u, e tou te o atu foi i lo‘u fale,”…Tuilaepa
Ua luitauina e le taitai o le Malo le afioga i le Palemia le autusitala le tatau ona tuliloa leoleo mo ni faamatalaga auiliili i mataupu e fitoitonu i le latou tautua. O le tuualalo ma le lu‘i a le Palemia e mafua ina ua toe fesiligia i lana faatalanoaga tai vaiaso i luga o le leitio o le 2AP, e faatatau i lana tusi na ave i le matagaluega o leoleo sa ave ai se tuualalo i le komesina o le matagaluega e faia pepa tusitusia mo le faasalalauina faalauaitele.
O se tusi tuualalo ua usitaia e le komesina ma le matagaluega o leoleo, ma ua lē toe faia ai ni feiloaiga tai vaiaso ma tusitala. Faaalia e le Palemia o loo tuliloaina o ia e tusitala, ma o nisi o taimi e o atu lava i lona maota toetoe lava ulufale se isi tusitala i lona potu e tofa ai, ma o lana fautuaga ia tuliloaina foi ma leoleo.
Saunoa le Palemia i luga o le leitio ia tuliloa lava leoleo ia lē gata o le agai i le ofisa ae faapea foi ona agai tusitala e tuliloa i le fale o le komesina. O lana fautuaga foi ia agai pea tusitala i le ofisa ma tuliloa i ai leoleo mo ni tali o a latou mataupu.
O le vaiaso na tea nei sa aumai ai se pepa o faamatalaga mai le matagaluega na faailoa ai se latou suesuega na maua ai ni auupega i luga o ni vaa o le sami. O lea pepa o faamatalaga e leai ma se faamatalaga a leoleo poo ā ia ituaiga o vaa, ae toafia na malaga mai ai, ae o ai foi tagata na malaga mai ai ma le mafuaaga na afea ai Samoa.
Na faia sailiga mo nisi faamatalaga mai leoleo ae o le tali na aumai, o loo pisi le komesina ma le sooupu i tapenaga o tuuga fautasi o le sisigafu‘a faapea tapenaga o le tulai faaaloalo a leoleo le guard of honour.
E oo mai lava i le Aso Faraile na tea nei e lei manuia sailiga i leoleo. Ua aumai se tusi faalauaitele mai le faalappotopotoga o tusitala faavaomalo e galulue i lalo o aiaiga o le faia o le galuega e aunoa ma le faalavelaveina, ma ua valuvalusia ai se finagalo o le faigamalo ina ia toe silasila i le sologa lelei o le faatinoga o tiute faatusitala i Samoa.
O loo talosagaina ai foi le toe silasila i le saogalemu o tusitala ma le leai o se fesoasoani a leoleo ina ua lipotia le fasia o ni tusitala o le nusipepa o le Samoa Observer a o agai e lipotia se faalavelave tau taavale i le tusa nei ma le vaiaso ua tuanai.
O loo mausali le mau a le Palemia, o Samoa le isi atunuu o le Pasefika o loo saoloto le faatinoga o galuega a tusitala e aunoa ma ni noataga e lē pei o isi malo o le Pasefika e pei o Fiti.
