Lua vaiaso e saili ai se fofo – a leai ua tapuni le Kolisi

E lua vaiaso ua ave e le Malo i le faipule o Sagaga le Usoga le afioga Muagututagata Peter Ah Him, e soalaupule ai faafitauli e faasino i le eleele o le a fausia ai le Kolisi maualuga a Sagaga; a lē maua ai se fofo o le a tapunia loa le Kolisi.
O le finagalo lea o le afioga i le Palemia susuga Tuilaepa Lupesoliai Sailele Malielegaoi, i le Palemene ina ua afea le mataupu i le tuai ona fausia o le faleaoga fou mo lea kolisi i se eleele i le nuu o Afega, lea o le a siitia i ai mai le nofoaga sa iai e lata i le sami i le afioaga o Tuanai.
O le tausaga ua mavae na suo tosina ai le eleele ma le faamoemoe o le a faatino le galuega peitai na lē taunuu lea fuafuaga ina ua iai se faalavelave a nisi e iai a latou aiā i le fanua. E oo mai i le taimi nei ua toe a‘e ai aoga a le fanau i lenei vaiaso, ae lei taoto mai lava i se tulaga lelei lea faaletonu.
O le mafuaaga lea o le finagalo o le taitai o le Malo na tuusa‘o i le faipule o le itumalo. Na saunoa le alii Palemia, o se tasi lea o itumalo e lē lelei le taitaiga ma e tatau i le faipule ona taulamua i le sailia o se faaiuga filemu i le mataupu.
O le Kolisi o Sagaga ua faaletonu faleaoga ma o se faafitauli ua tele ni tausaga o molimauina, ae talu ona asiasia e le Komiti a le Palemene e feagai ma le mataituina o le tulaga lelei o faleaoga ma isi vaega uma e faaaogā e fanau a le atunuu i totonu o aoga e aofia ai meaai, sa faapea ona maua ai le faaletonu o loo aafia ai lea aoga maualuga a le Malo.
O se fiafiaga foi o le Malo ina ua mafai ona iai se finagalo o le Komiti o lea kolisi faaitumalo e siitia atu le nofoaga o le aoga i se isi vaega e sili ona lelei ma saogalemu mo fanau a Sagaga le Usoga.
O le vaiaso fou e a‘e uma ai aoga a le atunuu ae ua lē taunuu ai ma fuafuaga mo le fausia o se faleaoga fou mo lea kolisi ona o tulaga ua aliali mai.
Tasi lea o aoga faaitumalo ua siitia lona tulaga ma avea ma Kolisi ae peitai ua motusia le fiafia o fanau aemaise o mātua o loo aooga o latou alo ma fanau i le kolisi ona o faafitauli ua ponatia ai le ola aoaoina o a latou fanau.
Ua faaalia e le taitai o le Malo i le afioga i le Palemia, a lē maua se iuga lelei o le faaletonu o loo aafia ai le fanua o le a siitia i ai le kolisi ma fausia ai se faleaoga fou, e sili loa ona tapuni ae ave faiaoga e galulue i isi aoga a le Malo o loo manaomia tele ni faiaoga.
O lona uiga o le avanoa foi lea o le a saili atu ai mātua i ni avanoa o o latou alo ma fanau i isi kolisi ma aoga maualuluga i le atunuu.