E 2 tausaga ua faasala ai i le falepuipui se tina mai le afioaga o Siumu ma Aukilani Niu Sila ina ua faamaonia moliaga o le ulufale faamalosi i se fale e aunoa ma se faatagaga, atoa ai ma le gaoi.
O Cathrine Faalogo se tina 31 tausaga toalima ona alo, lea ua mae’a faia i ai le faaiuga a le faamasinoga i le Aso Tofi ua mavae.
O lea tamaitai e tusa ai ma tolaulauga a le itu a leoleo, o loo faaalia ai le lelei fuafuaina o le faataunuuina o le tonu sa o latou faia ma ana uo. O le aso 23 o Setema o le tausaga ua mavae na o atu ai lē ua molia ma ana uo i le aoauli, paka la latou taavale, latalata i le supamaketi a le TNT Toleafoa i Fugalei.
Sa faailoa atu e se tasi o ana uo nei i lea tamaitai le tulaga tonu o le supamaketi o loo iai tupe, ma faia loa le tonu o le a alu Catherine i totonu e faatino le gaioiga ua mae’a fuafuaina.
Na agai i totonu o le faleoloa lē ua molia ma faatagā fealualua’i ai e pei o se tasi o loo faia sana faatau, ma agai atu ai i le potu o loo iai tupe, ina ua faato’ā alu ese mai le tagata faigaluega sa iai i totonu e faitau seleni mo le teuina i le faletupe.
E tusa ma $9,900 na toese mai e lē ua molia mai le potu ma toe agai atu loa i fafo. O le mae’a ai o le aso o le a faapaleni le tupe, na faato’ā iloa ai ua leai le tinoitupe e $9,900.
O lea loa taimi na faatino ai loa le suesuega a le supamaketi ma toe tilotilo ai loa i meapueata o le faleoloa, ma maua ai loa le ula lenei na alu ma le seleni.
O le aso 26 o Setema na molia ma taofia ai loa e leoleo le tamaitai 31 tausaga.
O le finauga a le itu a leoleo, o loo faailoa ai le tulaga e ogaoga ai le solitulafono a lea tina.
O le aofaiga o le tupe na ia gaoiina e fai si telē tele ma a faatusa atu i ai o le isi lea polofiti a le faleoloa mai le fia ni aso ua tuanai lea ua alu atu le ula lea sola ma ia.
O le isi itu o lea tina o loo iai foi nisi mataupu sa faasaga atu i ai i lea tamaitai, o nisi ua mae’a faia i ai le faaiuga a le faamasinoga ae o nisi o loo faatali.
Sa talosagaina e le itu a leoleo se faasalaga faafalepuipui mo Catherine e amata mai i le 4 tausaga faaopooopo i ai le 6 masina ona o nisi o ana solitulafono ua tuanai ai.
Ae i le Aso Tofi sa tuuina mai ai e Leiataualesa Daryl Clarke lana faaiuga e 2 tausaga faafalepuipuiina ai Catherine Faalogo. O le tamaitai loia ia Precious Chang na tulai mo Catherine i lenei mataupu.